შეერთებული შტატების სახელმწიფო უწყებების ინფორმაციით, რუსეთი, ჩინეთი და ირანი ეცდებიან ჩაერიონ 2020 წლის საპრეზიდენტო არჩევნებში ან მოახდინონ ზეგავლენა ამომრჩევლის ნებაზე.
აღნიშნულთან დაკავშირებით ერთობლივ განცხადებას ავრცელებენ შეერთებული შტატების იუსტიციისა და თავდაცვის დეპარტამენტები, ეროვნული უსაფრთხოების სამსახური, დაზვერვის სამსახური, გამოძიების ფედერალური ბიურო და კიბერუსაფრთხოების სააგენტო.
სახელმწიფო უწყებების განცხადებით, არჩევნებში ჩარევა შესაძლოა გამოხატული იყოს სხვადასხვა მანიპულაციით სოციალურ ქსელებში და კიბერშეტევებით საარჩევნო ინფრასტრუქტურაზე.
ცნობისთვის, სადაზვერვო სამსახურის მიერ 2017 წლის იანვარში ჩატარებული გამოძიების შედეგად დადგინდა, რომ რუსეთი ჩაერია 2016 წლის არჩევნებში, დონალდ ტრამპის არჩევნებში დახმარების მიზნით.
2018 წლის თებერვალში, შეერთებული შტატების იუსტიციის დეპარტამენტმა შექმნა პირველი სამუშაო ციფრული კიბერჯგუფი, რომელიც დაიცავს შეერთებულ შტატებში ჩატარებულ არჩევნებს საგარეო ჩარევისგან.