სრულიად საქართველოს კათოლიკოს-პატრიარქი, უწმინდესი და უნეტარესი ილია მეორე რუსეთის პატრიარქის კირილის მიერ 19 სექტემბერს ოკუპირებული სამხრეთ ოსეთისთვის დამოუკიდებლობის მილოცვის ფაქტს დღეს ეხმაურება და რუსეთის პატრიარქს სპეციალურ წერილს უგზავნის. როგორც "ჯი-ეიჩ-ენს" საქართველოს საპატრიარქოდან აცნობეს, სრულიად საქართველოს კათოლიკოს-პატრიარქის, უწმიდესის და უნეტარესის ილია II-ის წერილი მოსკოვში დღეს გაიგზავნა.
წერილში საქართველოს კათოლიკოს-პატრიარქი რუსეთის პატრიარქს მიუთითებს, რომ ეკლესია არ უნდა აყვეს პოლიტიკოსებსა და პოლიტიკურ პროცესებს და იმედს გამოთქვამს, რომ მომავალში სამართლიანობის მხარეს დადგება, რაც ხელს შეუწყობს ორ ქვეყანსს შორის კეთილმეზობლური ურთიერთობების დამყარებას.
ილია მეორე რუსეთის პატრიარქს სეპარატისტების მხარდაჭერისთვის საქართველოს საზოგადოებისა და თავის პირად რეაქციას აცნობეს და აღნიშნავს, რომ "საქართველოს მთელ საზოგადოებაში მძაფრი უარყოფითი რეაქცია გამოიწვია".
"მეტად სამწუხაროა და სრულიად გაუგებარი ასეთი ქმედება, რადგან ეს ნიშნავს საქართველოს ამ უძველეს მიწაზე (რასაც მთელი მსოფლიოც აღიარებს) ძალადობრივად არსებული სეპარატისტული რეჟიმის თქვენის მხრიდან მხარდაჭერას და უკანონოდ გამოცხადებული "დამოუკიდებლობის~ აღიარებას", _ ნათქვამია წერილში.
გთავაზობთ წერილის სრულ ტექსტს.
"მასობრივი ინფორმაციის საშუალებით გახდა ცნობილი, თითქოს თქვენ "დამოუკიდებლობის~ 20 წლისთავთან დაკავშირებით მილოცვა გაუგზავნეთ სამხრეთ ოსეთის თვთიაღიარებულ პრეზიდენტს, რამაც ჩვენს მრევლში და საერთოდ საქართველოს მთელ საზოგადოებაში მძაფრი უარყოფითი რეაქცია გამოიწვია.
მეტად სამწუხაროა და სრულიად გაუგებარი ასეთი ქმედება, რადგან ეს ნიშნავს საქართველოს ამ უძველეს მიწაზე (რასაც მთელი მსოფლიოც აღიარებს) ძალადობრივად არსებული სეპარატისტული რეჟიმის თქვენის მხრიდან მხარდაჭერას და უკანონოდ გამოცხადებული "დამოუკიდებლობის~ აღიარებას.
ჩვენ გვახსოვს პირადად თქვენი და რუსეთის ეკლესიის მხარდაჭერა საქართველოს და საქართველოს ეკლესიის კანონიკური საზღვრების აღიარების საკითხში. ამდენად სრულიად მოულოდნელი იყო ზემოაღნიშნული ნაბიჯი.
ვფიქრობთ, ეკლესია არ უნდა აყვეს პოლიტიკოსებს და პოლიტიკურ პროცესებს. გამოვთქვამთ იმედს, რომ მომავალში თქვენ კვლავაც სამართლიანობის მხარეს დადგებით, რაც ხელს შეუწყობს ჩვენს ქვეყნებს შორის კეთილმეზობლური ურთიერთობების დამყარებას"
ქრისტესმიერი სიყვარულით,
ილია II
სრულიად საქართველოს
კათოლიკოს-პატრიარქი
25 სექტემბერი, 2010 წელი"
