აშშ-ში ვიზიტის ფარგლებში საქართველოს პრეზიდენტი მიხეილ სააკაშვილი "მილენიუმ კორპორეიშენის" პრეზიდენტს დენიელ იოჰანესს შეხვდა. საქართველოს პრეზიდენტმა იოჰანესს საქართველოში 375 მილიონი დოლარის პროექტების დაფინანსებისათვის მადლობა გადაუხადა.
"გზის მშენებლობა, რომელიც სამხრეთ საქართველოს დედაქალაქთან დააკავშირებს, შემოდგომაზე დასრულდება. ეს პროქტი ადგილობრივი მოსახლეობის ყოფას მნიშვნელოვნად გააუმჯობესებს. თბილისამდე გზა 3-ჯერ შემოკლდება. შედეგად ხელმისაწვდომი, შიქმნება ახალი კურორტები, ტბისპირა დასასვენებელი კომპლექსები, გაფართოვდება სოფლის მეურნეობა, რასაც ლიბერალური ეკონომიკური გარემოც შეუწყობს ხელს", - განაცხადა სააკაშვილმა.
ამერიკელ ბიზნესმენებთან შეხვედრისას, სააკაშვილმა ბათუმში დიდი ტექნიკური უნივერსიტეტის მშენებლობის აუცილებლობაზეც ისაუბრა.
პრეზიდენტის თქმით, უნივერსიტეტს სტუდენტების მიიღება არა მხოლოდ საქართველოს რაიონებიდან, არამედ უკრაინიდან, აზიიდან და მთელი კავკასიის რეგიონიდან შეეძლება.
"ეს გაერთიანებული და თავისუფალი კავკასიის ხედვის გამოძახილია. ამ სასწავლებლის კურსდამთავრებული ადამიანი ადვილად შეძლებს სამუშაო ადგილის პოვნას. ეს კიდევ უფრო გაზრდის ეკონომიკას და შექმნის სამუშაო ადგილებს. თქვენ გვეხმარებით ინფრასტრუქტურის განვითარებაში, მაგრამ ასევე ძალიან მნიშვნელოვანია განათლების სფეროში წინსვლა. მიმაჩნია, რომ განათლების ამერიკული სტანდარტი მსოფლიოში საუკეთესოა და ეს სტანდარტი ყველასთვის ხელმისაწვდომი უნდა გახდეს", - აღნიშნა სააკაშვილმა.
ამერიკელ ბიზნესმენებთან შეხვედრაზე პრეზიდენტმა ასევე აღნიშნა, რომ აზერბაიჯანელ პარტნიორებთან ერთად ამჟამად მიმდინარეობს თურქეთთან დამაკავშირებელი სარკინიგზო ხაზის მშენებლობა.
მიხეილ სააკაშვილმა ისაუბრა ფოთის თავისუფალი ეკონომიკური ზონის შესახებაც..
