იუსტიციის მინისტრი ზურაბ ადეიშვილი აცხადებს, რომ მოსამართლეთა უვადოდ დანიშვნისას გამოსაცდელი ვადა ბევრ ქვეყანაში არსებობს და მისთვის გაუგებარია, ამ ნორმას საქართველოში ოპოზიცია რატომ აპროტესტებს. ამის შესახებ განცხადება ადეიშვილმა რიგგარეშე სესიაზე საკონსტიტუციო ცვლილებების პროექტის პირველი მოსმენისას გააკეთა.
მოსამართლეთა გამოსაცდელი ვადის საკითხი სესიაზე რამდენიმე დეპუტატის მხრიდან დაისვა. ადეიშვილმა განაცხადა, რომ მოსამართლეები გამოსაცდელი ვადით ბევრ ქვეყანაში ინიშნებიან, მათ შორის გერმანიაში და შესაბამისად პროექტი თანხვედრაშია ევროპული ქვეყნების კონსტიტუციებთან.
რაც შეხება იმ არგუმენტს, რომ მოხდება გამოსაცდელი ვადის ბოროტად გამოყენება, ადეიშვილი განმარტავს, რომ გამოსაცდელ ვადასთან დაკავშირებით გადაწყვეტილებას იღებს იუსტიციის საბჭო, რომელიც მოსამართლეებითაა დაკომპლექტებული და ამ პროცესში პოლიტიკოსების ჩარევა გამორიცხულია.
