იუსტიციის მინისტრი ზურაბ ადეიშვილი აცხადებს, რომ მთავრობისთვის უნდობლობის გამოცხადების პრინციპი სწორედ პარლამენტის როლის გაძლიერების მანიშნებელია და არა პირიქით. ეს განცხადება ადეიშვილმა დღეს პარალმენტში რიგგარეშე სესიაზე საკონსტიტუციო ცვლილებების პროექტის პირველი მოსმენით განხილვისას გააკეთა.
საკითხი ქრისტიან-დემოკრატების ლიდერმა გიორგი თარგამაძემ დასვა. როგორც მან აღნიშნა, პარლამენტის მიერ მთავრობისთვის უნდობლობის გამოცხადებისას პრეზიდენტის ვეტოს დაძლევის კვოტა - 3/5 ძალიან მაღალია. ამიტომ მიიჩნევს, რომ ამის გამო პარამენტი მთავრობისადმი დამოკიდებული იქნება. თარგამაძე აღნიშნული საკითხის გადახედვას და შესწორებას ითხოვს. იუსტიციის მინისტრი კი აცხადებს, რომ ეს ნორმა არ ასუსტებს პარლამენტს, არამედ უფრო მეტად აძლიერებს, ვიდრე დღეს არის. არგუმენტად იმ ფაქტორს ასახელებს, რომ პრეზიდენტს აღარ ექნება უფლება, დაითხოვოს პარალმენტი, თუ პარლამენტი ცალსახად 3/5-ით არის ჩამოყალიბებული მთავრობისადმი უნდობლობის საკითხში.
"ამიტომ ეს მეტი გარანტიაა, ვიდრე დღეს არსებობს", - აცხადებს ადეიშვილი.
