"მემარჯვენეების" ლიდერმა დავით გამყრელიძემ დღეს, პარტიის ოფისში გამართულ პრესკონფერენციაზე, გაეროში პრეზიდენტ მიხეილ სააკაშვილის გამოსვლასთან დაკავშირებით კომენტარი გააკეთა. მისი თქმით, როდესაც პრეზიდენტი აფხაზ და ოსი ხალხის მისამართით გაკეთებულ შეთავაზებაზე საუბრობდა, აუცილებლად უნდა აღენიშნა აფხაზეთის ე.წ. რესპუბლიკის ვიცე-პრეზიდენტზე, ალექსანდრ ანქვაბზე განხორციელებული თავდასხმის ფაქტიც. გამყრელიძის თქმით, მიუხედავად იმისა, რომ ანქვაბი სხვა ბანაკში იმყოფება, იგი აფხაზეთის რუსიფიკაციის მოწინააღმდეგეა.
"რაც შეეხება შეთავაზებას აფხაზი და ოსი ხალხისთვის. ვფიქრობ ამ შეთავაზებას ამ ხალხებთან ურთიერთობის აღდგენისთვის რეალურად გადადგმული ნაბიჯები უნდა ახლდეს. შეცდომა იყო, როდესაც პრეზიდენტმა იგნორირება გაუკეთა აფხაზეთში ალექსანდრე ანქვაბზე განხორციელებული თავდასხმის ფაქტს და ამაზე არ ისაუბრა. ხომ ცნობილია, რომ მიუხედავად სხვა ბანაკში ყოფნისა, ანქვაბი, ისევე, როგორც ჩვენ, ეწინააღმდეგება აფხაზეთის რუსიფიკაციას, აფხაზი ხალხის კულტურის, ენის, თვითმყოფადობის გაქრობას. თუ კონფლიქტის მშვიდობიანად მოგვარებაზე ვსაუბრობთ, არ შეიძლება არ გავღელვებდეს ის პროცესები, რაც დღეს აფხაზეთში ხდება", - განაცხადა გამყრელიძემ.
მისივე თქმით, საქართველოს პრეზიდენტის "მაღალი ტრიბუნებიდან გამოსვლების" ტექტების შინაარსი დღევანდელ რეალობისაგან შორს არის:
"სამწუხაროა, რომ ასეთი მაღალი ტრიბუნებიდან პრეზიდენტის გამოსვლები სულ უფრო შორდება იმ რეალობას, რაც ქვეყანაში დემოკრატიის თვალსაზრისით არსებობს", - აღნიშნა გამყრელიძემ.
