ხელისუფლებამ საზოგადოებისათვის 2004 წელს მიცემული პირობა შეასრულა. ეს განცხადება იუსტიცის მინისტრმა ზურაბ ადეიშვილმა დღეს პარლამენტში საკონსტიტუციო ცვლილებების პროექტის წარდგენისას გააკეთა.
პარლამენტი დღეს რიგგარეშე სესიაზე იხილავს საკონსტიტუციო ცვლილებების პროექტს პირველი მოსმენით.
საკითხის მომხსენებელი კი ზურაბ ადეიშვილია და როგორც იგი აცხადებს, ამ პროექტის შემუშავებას მნიშვნელობა ჰქონდა, როგორც ქვეყნის განვითარებისათვის, ასევე საზოგადოებისათვის მიცემული პირობის შესრულების თვალსაზრისით.
"2004 წელს, როდესაც შეიცვალა კონსტიტუცია მაშინ ვთქვით, რომ ეს იყო შუალედური მოდელი და გაგრძელდებოდა მუშაობა ევროპული მოდელის ჩამოსაყალიბებლად და ახლა შემიძლია ვთქვა რომ ეს პირობა შესრულდა", - განაცხადა ზადეიშვილმა.
მისი თქმით, წარმოდგენილი პროექტი არის უაღრესად მნიშვნელოვანი, რადგან თანხვედრაშია ევროპულ კონსტიტუციებთან და მიიჩნევს, რომ ცვლილებების მიღებას ქვეყნისათვის აქვს უდიდესი მნიშვნელობა.
"მოდელი, რომელიც წარმოვადგინეთ არის დაბალანსებული და ითვალისწინებს, ძლიერ საპარლამენტო, ძლიერი მთავრობის სისტემას და ასევე ძლიერი პრეიზდენტის შენარჩუნებას. აგრეთვე გაზრდილია სასამართლო ხელისუფლების როლი და მიგვაჩნია, რომ ეს არის სწორედ მმართველობის სისტემის ევროპული მოდელი", - აცხადებს ადეიშვილი.
