ეკონომიკისა და მდგრადი განვითარების მინისტრი ვერა ქობალია ამერიკის შეერთებულ შტატებში საქმიან ვიზიტს განაგრძობს.
სამინისტროს ინფორმაციით, ვერა ქობალიას აშშ-ში ვიზიტის მთავარი მიზანია აშშ-ს სავაჭრო დეპარტამენტსა და ბიზნესსექტორთან ურთიერთობების გაღრმავება და საქართველოში ინვესტიციების მოზიდვის ხელშეწყობა.
მინისტრმა მონაწილეობა მიიღო და სიტყვით გამოვიდა ამერიკულ-ქართულ ბიზნესსამიტსა და ამერიკა-საქართველოს ბიზნესსაბჭოს მე-13 წლიურ კონფერენციაზე, ამასთან კონფერენციის ფარგლებში შეხვედრები გამართა საერთაშორისო სავაჭრო ადმინისტრაციის წარმომადგენელთან კავკასიისა და ცენტრალური აზიის ქვეყნებში და ამერიკელ ბიზნესმენებთან.
ვერა ქობალიამ ასევე შეხვედრები გამართა ამერიკის შეერთებული შტატების უმსხვილესი ტექნოლოგიური ბრენდების, მათ შორის კომპანიების "Cisco"-ს, "HP"-ს, "Intel"-ის, IBM-ის, RACLE-სა და "Google"-ის მენეჯმენტის წარმომადგენლებთან, გაეცნო უახლეს ინტერნეტ და ტექნოლოგიურ მიღწევებს.
ეკონომიკისა და მდგრადი განვითარების მინისტრთან შეხვედრისას რამდენიმე კომპანიის, მათ შორის "Cisco"-სა და "Intel"-ის ხელმძღვანელებმა საქართველოსთან ბიზნეს-ურთიერთობების გაღრმავების სურვილი გამოთქვეს. როგორც "ჩისცო"-ს გენერალურმა მენეჯერმა ბალტიის, ცენტრალური აზიისა და აღმოსავლეთ ევროპის რეგიონში, პიტერ კაჯდუმ აღნიშნა, კომპანია საქართველოში ცენტრის გახსნას აპირებს, რომელიც განათლებისა და მცირე და საშუალო ბიზნესის განვითარების კუთხით იმუშავებს.
ამასთან, მისივე ინფორმაციით, კომპანია უზრუნველყოფს საქართველოში სან-ფრანცისკოს ტექნიკური უნივერსიტეტის სტუდენტთა ჯგუფის ჩამოყვანას, რომელიც აქ უფასოდ იმუშავებს, მათ შორის ინვესტიციების მოზიდვის კუთხით. ქართულ მხარესთან კონტაქტების გაღრმავების სურვილი გამოთქვა კომპანია "Intel"-ის ხემლძღვანელობამაც, ამ მიზნით კომპანიის დელეგაცია ოქტომბერში საქართველოში ვიზიტს გეგმავს.
საქართველოს ეკონომიკისა და მდგრადი განვითარების მინისტრის განცხადებით, საქართველოში შემოსვლით პრაქტიკულად, ყველა კომპანიაა დაინტერესებული, ვისთანაც მან შეხვედრები გამართა, ისინი ქართველ ბიზნესპარტნიორებს ეძებენ და შესაბამისად, ახლა ბევრი რამ ქართული ბიზნეს-სექტორის აქტივობაზეა დამოკიდებული.
საქართველოს ეკონომიკისა და მდგრადი განვითარების მინისტრი ამერიკის შეერთებულ შტატებში ვიზიტისას ისეთი ცნობილი და პრესტიჟული უმაღლესი სასწავლებლის პროფესორებსაც შეხვდა, როგორიც ბერკლის უნივერსიტეტია.
შეხვედრისას საუბარი ტექნიკურ-ეკონომიკური განათლების საკითხებს და ამ მიმართულებით ჩვენს ქვეყნებს შორის თანამშრომლობის პერსპექტივებს შეეხო.
მინისტრი ვიზიტის ფარგლებში ამერიკაში ღვინის წარმოების მხრივ ყველაზე განვითარებულ რეგიონს, კალიფორნიის ჩრდილოეთით მდებარე ცნობილ "ნაპაველ"-საც ესტუმრა. ვერა ქობალიამ იქ გაშენებული ვენახები დაათვალიერა და ცნობილი ღვინოების წარმოების პროცესს გაეცნო.
კალიფორნიაში ვიზიტისას მინისტრმა ასევე შეხვედრები გამართა სან-ფრანცისკოს მერიის წარმომადგენლებთან, რომლის ფარგლებშიც მხარეები ტურიზმისა და თანამედროვე ტექნოლოგიების სფეროში თანამშრომლობაზე შეთანხმდნენ.
