კურორტ "გოდერძიზე" სასტუმროს მშენებლობის მიზნით აჭარის მთავრობა ინვესტორს ეძებს. ამ მიზნით, აჭარის ფინანსთა და ეკონომიკის სამინისტრომ გასაყიდად გამოიტანა ხულოს მუნიციპალიტეტში, გოდერძის უღელტეხილზე მდებარე 4136 კვ.მ არასასოფლო-სამეურნეო დანიშნულების მიწის ნაკვეთის და მასზე განლაგებული 86,37 კვ.მ შენობა ნაგებობა.

ობიექტის საწყისი ღირებულება 135 ათასი ლარია, ხოლო მისი გასხვისება 18 ივლისისთვის ჩანიშნულ აუქციონზე იგეგმება. აუქციონის პირობების მიხედვით, ინვესტორი ვალდებულია, 2020 წლის 31 მარტამდე მინიმუმ 50 ნომერზე გათვლილი სასტუმროს მშენებლობა დაიწყოს, ხოლო 2022 წლის 1 ნოემბრამდე სასტუმრო ექსპლუატაციაში შეიყვანოს.

აუქციონში გამარჯვებული ვალდებულია ასევე, რომ სასტუმროს ამოქმედებიდან მინიმუმ 20 წლის განმავლობაში სასტუმროს პროფილი შეინარჩუნოს და ასევე დასაქმებულთა 90% საქართველოს მოქალაქეები იყვნენ.

ინვესტორმა სასტუმროს მშენებლობაში მინიმუმ 1 500 000 ლარის ინვესტიცია უნდა განახორციელოს.