ცხინვალის რეგიონის ოკუპირებული ტერიტორიების მიმდებარე სოფლებში წყლის პრობლემა მომავალი სარწყავი სეზონისთვის მოგვარდება.
ამის შესახებ განცხადება სოფლის მეურნეობის მინისტრის მოადგილემ, ლევან ჭოლაძემ, პარლამენტში, ტერიტორიული მთლიანობის აღდგენის კომისიის სხდომაზე გააკეთა.
მისი ინფორმაციით, შარშან დაიწყო და წელს დასრულდება სარწყავი ნაგებობის მშენებლობა, რომელიც თავისი ტექნიკური შესაძლებლობებით უპრეცედენტოა.
როგორც სხდომაზე აღინიშნა, სარწყავი ნაგებობა 6 აგრეგატისგან შედგება. ამჟამად მიმდინარეობს მოლაპარაკება მეშვიდე აგრეგატის შეძენაზე, რაც მილების გაყვანის შემდეგ, სრულიად უზრუნველყოფს ცხინვალის რეგიონის ოკუპირებული ტერიტორიების მიმდებარე სოფლების სასოფლო-სამეურნეო დანიშნულების მიწების მორწყვას.
პროექტის მიღმა რჩება ზემო ნიქოზის მოსახლეობა, რადგან მას წყლით მომარაგების სხვა წყარო სჭირდება.
სოფლის მეურნეობის სამინისტროს ინფორმაციით, პროექტი საწყის სტადიაშია და შესაძლოა 2011 წლისათვის მომზადდეს.
რაც შეეხება მოხმარებული წყლის გადასახადს, გლეხები მას იდენტიფიცირებისა და ინდივიდუალური ხელშეკრულების შესაბამისად გადაიხდიან.
ტერიტორიული მთლიანობის აღდგენის კომისიის თავმჯდომარეს, შოთა მალაშხიას მიაჩნია, რომ უნდა შედგეს ხელისუფლების მიერ უკვე განხორციელებული სამუშაოს პრეზენტაცია, რათა საზოგადოებას ჰქონდეს ინფორმაცია იმის შესახებ, რაც აღნიშნული პრობლემის აღმოსაფხვრელად კეთდება.
