პარტია "თავისუფალი დემოკრატების" ლიდერი ირაკლი ალასანია სამოქალაქო საზოგადოებას საჯარო დისკუსიების დაწყებას და ქართული ბიზნესის დაცვას მოუწოდებს. როგორც ალასანიამ პარტიის ოფისში გამართულ ბრიფინგზე აღნიშნა, თვითმმართველობის არჩევნების შემდეგ ქართული ბიზნესის 50%-ზე მეტი საგადასახადო სამსახურის წნეხის ქვეშ არის.
"ქართული ბიზნესი წნეხის ქვეშაა. ეკონომიკურ პოლიტიკას განსაზღვრავს არა შესაბამისი უწყებები არამედ პროკურატურა. ხელისუფლების თავდაპირველი დაპირებებების მიუხედავად, მთავრობამ გადაუხვია საგადასახადო გარემოს ლიბერალიზაციისკენ მიმავალ გზას. მოვუწოდებ სამოქალაქო საზოგადოებას დავიწყოთ საჯარო დისკუსიები და ერთობლივი ძალებით დავიცვათ ბიზნესი", - განაცხადა ალასანიამ.
ალასანიამ აგრეთვე ისაუბრა უმუშევრობაზეც. მისი თქმით, საქართველოში უმუშევრობა 30%- აჭარბებს და მომავალ წელს, სააკაშვილის უპასუხისმგებლო პოლიტიკით სამსახურს კიდევ ათასობით ადამიანი დაკარგავს.
