მთავრობამ, "საპარტნიორო ფონდისთვის" მოიცალა. პრემიერ-მინისტრმა, მამუკა ბახტაძემ განაცხადა, რომ ბიზნესმოდელი, რაც "საპარტნიორო ფონდს" აქვს, არაეფექტურია და უნდა შეიცვალოს. ფონდის არაეფექტურობაზე ისაუბრეს დეპუტატების დიდმა ნაწილმაც. განსხვავებული მოსაზრება აქვს ეკონომიკის ყოფილ მინისტრს გიორგი ქობულიას. მისი თქმით, მისი მინისტრობისას შეისწავლეს და დაასკვნეს, რომ წლების განმავლობაში ფონდი არაეფექტიანად იმართება და ბევრი გადაწყვეტილება მიიღება პოლიტიკური კუთხით, ზეწოლით დ ა.შ. ქობულიას თქმით, რაც ფული აქვს ფონდს ჩადებული, 25% აქვს დაკარგული.
"საპარტნიორო ფონდის" აღმასრულებელ დირექტორს დავით საგანელიძეს კი იმის მტკიცება უწევს, რომ ფონდს თავად კარგად უძღვება, კრახის მიზეზი კი ის არის, რომ მას ფონდში ყოფილმა პრემიერმა, გიორგი კვირიკაშვილმა და ეკონომიკის ყოფილმა მინისტრმა, დიმიტრი ქუმსიშვილმა რეფორმა არ ჩაატარებინეს. კიდევ ერთი მიზეზი, როგორც საგანელიძემ ამბობს, ყოფილი მინისტრი გიორგი ქობულიაა. მისი თქმით, ეკონომიკის ყოფილი მინისტრი გიორგი ქობულია ფონდის მიმართ ძალიან დიდ უპასუხისმგებლობას იჩენდა, რადგან გარკვეულ დოკუმენტებზე ხელის მოწერას თვეების განმავლობაში აჭიანურებდა.
"პირველი არხის" გადაცემა "ბიზნესპარტნიორის" ეთერში საგანელიძემ თქვა, რომ კვირიკაშვილის მთავრობამ "საპარტნიორო ფონდის" რეფორმას მხარი არ დაუჭირა.
საგანელიძე ამტკიცებს, რომ ის "საპარტნიორო ფონდის" რეფორმას ჯერ კიდევ მაშინ ითხოვდა, როდესაც საპარლამენტო უმრავლესობას ხელმძღვანელობდა. მისი თქმით, "საპარტნიორო ფონდის" რეფორმაზე საუბარი ჯერ კიდევ ირაკლი ღარიბაშვილის პრემიერ-მინისტრობის დროს დაიწყო და საერთაშორისო საფინანსო ინსტიტუტებთან ერთად მუშაობა მიმდინარეობდა.
"მომზადდა რეფორმის დოკუმენტი, რომელიც მთავრობაში გიორგი კვირიკაშვილის პრემიერ-მინისტრობის დროს შევიდა, ეკონომიკის სამინისტროს კი, სათავეში დიმიტრი ქუმსიშვილი ედგა. კვირიკაშვილიც და ქუმსიშვილიც გამოვიდნენ და თქვეს, რომ მიუხედავად იმისა, რომ დოკუმენტში არის გარკვეული საინტერესო მომენტები, დღესდღეობით, მიგვაჩნია, რომ ფონდი არსებული სტრუქტურით უნდა დარჩეს. შესაბამისად, აღნიშნული დოკუმენტი გაჩერდა. შევეგუე იმას, რა გადაწყვეტილებაც მიიღეს", -- განმარტა საგანელიძემ.
ცნობილია, რომ 2017 წელს ფონდის ზარალმა 481 მილიონ ლარს გადააჭარბა. ამ მომენტამდე არ არის გამოქვეყნებული 2018 წლის ანგარიში.
სს "საპარტნიორო ფონდი" არის სახელმწიფო საინვესტიციო ფონდი, რომელიც დაარსდა 2011 წელს. "საპარტნიორო ფონდი" შეიქმნა სატრანსპორტო, ენერგეტიკისა და ინფრასტრუქტურის სფეროში არსებული მსხვილი სახელმწიფო საწარმოების კონსოლიდაციის ბაზაზე. ფონდის აქტივების პორტფელი შედგება შემდეგი კომპანიებისგან: საქართველოს რკინიგზა - 100% წილი; საქართველოს ნავთობისა და გაზის კორპორაცია - 100% წილი; საქართველოს სახელმწიფო ელექტროსისტემა - 100% წილი; ელექტროენერგეტიკული სისტემის კომერციული ოპერატორი - 100% წილი; სს თელასი - 24.5% წილი. საპარტნიორო ფონდის შემადგენლობაშია "თბილისის ლოგისტიკური ცენტრი", რუხის სავაჭრო ცენტრის 100%, "ბორჯომი--ლიკანი ინტერნეიშენალის" 50% და სხვ.
დავით საგანელიძე ფონდს 2015 წლიდან ხელმძღვანელობს.
