საქართველოში მობილური შემოსავლების ზრდის განაკვეთი 2017 და 2018 წლებში მშპ ზრდის განაკვეთს აღემატება, რაც არ არის გლობალურ ტენდენციასთან თანხვედრაში, სადაც 2016 წლიდან მობილური შემოსავალი, გლობალური მშპ ზრდის ფონზე, შემცირებისკენ მიდის, ხოლო საქართველოში - პირიქით. . როგორც კომუნიკაციების ეროვნული კომისიის 2018 წლის ანგარიშია აღნიშნული, ზრდა ნაწილობრივ განპირობებულია მობილურ მომსახურებაზე აქციზის გადასახადის გაუქმებით. 2011 წელს შემოსავლების მკვეთრი კლება, ბაზარზე „ვიონი საქართველოს” პოზიციების გამყარებით, კონკურენციის გამძაფრებასთანაა დაკავშირებული. 2015 წელს შემოსავლების კლება კი გამოწვეულია ურთიერთჩართვის ტარიფის 5 თეთრიდან 3.5 თეთრამდე შემცირებით. შედეგად, ოპერატორების მიერ მოხდა მობილურ ხმოვან მომსახურებაზე ტარიფების შემცირებაც.
2018 წელს მობილური შემოსავლების 74% (356 მლნ) ფიზიკური პირების სეგმენტმა, ხოლო 26% (125 მლნ) იურიდიული პირების სეგმენტმა დააგენერირა. 2015 წლიდან იურიდიული პირებისგან მიღებული შემოსავლების ზრდის სტაბილური ტენდენცია იკვეთება.
2018 წლის მონაცემების მიხედვით, თვის განმავლობაში, ერთი აბონენტისგან მიღებულმა საშუალო შემოსავალმა ARPU15 – Average Revenue per User (დღგ-ს და აქციზის გარეშე) საშუალოდ 8.2 ლარი შეადგინა. 2017 წელთან შედარებით, ეს მაჩვენებელი 80 თეთრით გაიზარდა.
ოპერატორების ჭრილში 2018 წლის IV კვარტლის მონაცემებით, ARPU-ს ყველაზე მაღალი მაჩვენებელი „მაგთიკომს“ აქვს, შემდეგ „სილქნეტი|ჯეოსელს“, ხოლო ყველაზე მცირე თანხას მობილურ კავშირზე „ვიონი საქართველოს“ აბონენტები ხარჯავენ.
2018 წელს იურიდიული პირი აბონენტების ARPU-ს მაჩვენებელი გაზრდილია და ბოლო წლების განმავლობაში, 2013 წლის შემდეგ, პირველად აღემატება ფიზიკური პირი აბონენტების ARPU-ს მაჩვენებელს, რაც ფასწარმოქმნის რეგულირების გამკაცრებასთან და ფიჭური სატელეფონო მომსახურების კონსოლიდირებულ ტენდერთან დაკავშირებული ხარვეზების გამოსწორების შედეგია.
2018 წელს ჯამურმა გამავალმა ხმოვანმა ტრაფიკმა 9.9 მლრდ წუთი შეადგინა. 2017 წელთან შედარებით, ტრაფიკი 2.7%-ით გაიზარდა. შესაბამისად, გაიზარდა MOU. თუ 2017 წლის IV კვარტალში ის 149 წუთს შეადგენდა, 2018 წლის IV კვარტალში მაჩვენებელი 153 წუთზე ავიდა.
მობილური ოპერატორების ჭრილში, MOU-ს მონაცემები 2018 წლის IV კვარტალში განსხვავებულია: საშუალოდ ყველაზე მეტს „ვიონი საქართველოს“ აბონენტები საუბრობენ, რაც გამოწვეულია კომპანიის მიერ შემოთავაზებული შედარებით დაბალი ტარიფებით, შემდეგ „მაგთიკომის“ მომხმარებლები, ხოლო ყველაზე ცოტას - „სილქნეტი|ჯეოსელის“ აბონენტები. 2018 წელს წინა პერიოდებისგან განსხვავებით, სამივე კომპანიის აბონენტების მიერ ნასაუბრები წუთების რაოდენობა თითქმის იდენტურია.
