სიმბოლურ ფასად გაყიდული ობიექტების ეპოპეა გრძელდება. ამჯერად საქართველოს მთავრობამ შპს „ორბი ჯგუფი ბახმაროს“ კურორტ ბახმაროში სახელმწიფო საკუთრებაში არსებული არასასოფლო-სამეურნეო დანიშნულების მიწის ნაკვეთი და მათზე განთავსებული შენობა-ნაგებობები სიმბოლურ ფასად - 1 ლარად მიჰყიდა.
როგორც მთავრობის N1098 განკარგულებიდან ირკვევა, უძრავი ქონება ჩოხატაურის მუნიციპალიტეტის კურორტ ბახმაროში, გურიის ქუჩაზე მდებარეობს. ინვესტორი ვალდებულია, სიმბოლურ ფასად გადაცემულ ქონებაზე ან მის ნაწილზე 60 თვეში მინიმუმ 120 ნომერზე გათვლილი სასტუმრო, კომერციული დანიშნულების ფართები, კვების ობიექტები, სპორტული მოედნები განათავსოს.
იმავდროულად, ტერიტორიაზე 10 წლის განმავლობაში მრავალბინიანი სახლის მშენებლობა არ უნდა მოხდეს.
მთავრობის განკარგულების მიხედვით, პროექტის განსახორციელებლად ინვესტორმა ანუ „ორბი ჯგუფი ბახმარომ” პირადად ანუ მესამე პირის მეშვეობით მინიმუმ 50 მლნ ლარის ინვესტიცია უნდა განახორციელოს.
