2019 წლის აჭარის რესპუბლიკურ ბიუჯეტში პირველი ცვლილება შედის. ბიუჯეტში შესატანი ცვლილების მიხედვით,  ბიუჯეტის შემოსულობების საპროგნოზო მაჩვენებელი 18 მლნ 159 ათას 400 ლარით იზრდება და 342 მლნ 203 ათას 400 ლარით განისაზღვრება. რესპუბლიკური ბიუჯეტის შემოსულობების საპროგ­ნოზო მაჩვენებელი იზრდება 18 159,4 ათასი ლარით. 

აჭარის ფინანსთა და ეკონომიკის სამინისტროს ინფორმაციით, რესპუბლიკური ბიუჯეტის შემოსავლები ფაქტიური და მოსალოდნელი შესრულების გათვალისწინებით 2019 წლის დამტკიცებულ საპროგნოზო მაჩვენებელთან შედარებით იზრდება 7 500,0 ათასი ლარით და მისი საპროგნოზო მაჩვენებელი განისაზღვრა 270 996,0 ათასი ლარით. 

როგორც განმარტებით ბარათშია აღნიშნული, იზრდება საშემოსავლო გადასახადი 6 000,0 ათასი ლარით და წლიური საპროგნოზო მაჩვენებელი განისაზღვრა 261 000,0 ათასი ლარის ოდენობით.

ასევე იზრდება სხვა შემოსავლების საპროგნოზო მაჩვენებელი 1 500,0 ათასი ლარით და წლიური საპროგნოზო მაჩვენებელი განისაზღვრა 9 996,0 ათასი ლარის ოდენობით. კერძოდ, სახელმწიფოს წილობრივი მონაწილეობით მოქმედი საწარმოების მოგებიდან მიღებული დივიდენდები - 1 500,0 ათასი ლარით.

არაფინანსური აქტივების კლების საპროგნოზო მაჩვენებელი იზრდება 3 000,0 ათასი ლარით და წლიური საპროგნოზო მოცულობა განისაზღვრა 18 850,0 ათასი ლარით. კერძოდ, არაწარმოებული აქტივების (მიწა) გაყიდვიდან შემოსულობის საპროგნოზო მაჩვენებელი იზრდება 3 000,0 ათასი ლარით და განისაზღვრა 15 299,0 ათასი ლარით. 

ფინანსური აქტივების კლების საპროგნოზო მაჩვენებელი იზრდება 7 659,4 ათასი ლარით და განისაზღვრა 52 357,4 ათასი ლარის ოდენობით.

სამინისტროში განმარტავენ, რომ რესპუბლიკური ბიუჯეტის ასიგნებების ცვლილება გამოწვეულია ძირითადად საბიუჯეტო ორგანიზაციების მიერ მიმდინარე წელს განსახორციელებელი ახალი და მოქმედი პროექტების მოცულობის ცვლილებით, ადგილობრივ თვითმმართველ ერთეულებზე დამატებით სხვადასხვა ინფრასტრუქტურულ პროექტებზე ფინანსური დახმარების მოცულობის ზრდის, სახელმწიფო შესყიდვების შედეგად წარმოშობილი ეკონომიებისა და სხვადასხვა გარემოებებით.

კერძოდ,  2019 წლის რესპუბლიკური ბიუჯეტის ცალკეული გადასახდელების მოცულობა მცირდება 11 366,9 ათასი ლარით:

აჭარის ფინანსთა და ეკონომიკის სამინისტრო - 1 596,9 ათასი ლარით (მათ შორის  საავტომობილო და სამელიორაციო სისტემების მართვა - 68,6 ათასი ლარით და სამელიორაციო სისტემების რეაბილიტაცია - 1 000,0 ათასი ლარით, ვინაიდან სამელიორაციო საქმიანობის განხორციელების ფუნქცია რესპუბლიკური ბიუჯეტის ცვლილების შემდგომ გადაეცემა აჭარის ავტონომიური რესპუბლიკის სოფლის მეურნეობის სამინისტროს, საგზაო ტექნიკის შეძენა - 472,2 ათასი ლარით);

განათლების, კულტურის და სპორტის სამინისტრო - 779,6 ათასი ლარით (მათ შორის ახალგაზრდულ საქმეთა სფეროს ხელშეწყობა 483,5 ათასი ლარით,  რესპუბლიკური ბიუჯეტის ცვლილების შემდგომ სპორტისა და ახალგაზრდობის საქმეთა დეპარტამენტს გამოეყოფა ახალგაზრდობის კომპონენტი, შესაბამისად რეორგანიზაციის თანახმად ჩამოყალიბდება სპორტის დეპარტამენტი და შეიქმნება ახალი ორგანიზაცია სსიპ ახალგაზრდობის რეგიონული ცენტრი);

ჯანმრთელობისა და სოციალური დაცვის სამინისტრო - 4,1 ათასი ლარით;

სოფლის მეურნეობის სამინისტრო - 3 986,3 ათასი ლარით (მათ შორის ააიპ აგროპროექტების მართვის ცენტრის ლიკვიდაციასთან დაკავშირებით ცენტრის პროგრამის „სოფლის მეურნეობის განვითარება მაღალეფექტური ტექნოლოგიების დანერგვის გზით“ ფარგლებში გათვალისწინებული ქვეპროგრამების ღონისძიებები მცირდება 3 549,5 ათასი ლარით, რომელთა განხორციელება გაგრძელდება სოფლის მეურნეობის სამინისტროსა და ააიპ აგროსერვის ცენტრის მეშვეობით, აქედან  805,5 ათასი ლარით უქმდება ააიპ აგროპროექტების მართვის ცენტრის პროგრამის „სოფლის მეურნეობის განვითარება მაღალეფექტური ტექნოლოგიების დანერგვის გზით“ ქვეპროგრამა „ნიადაგის ნაყოფიერების ამაღლების ხელშეწყობა“, ვინაიდან ზემოაღნიშნულ ქვეპროგრამაში გათვალისწინებული (ბიო) სასუქზე მოთხოვნა მიმდინარე ეტაპზე გაცილებით მცირეა);

საერთო რესპუბლიკური მნიშვნელობის გადასახდელები - 5 000,0 ათასი ლარით (შპს სტადიონის დაფინანსება მცირდება დახურული სპორტული კომპლექსი - ყინულის არენა და საცურაო აუზის პროექტით განსზღვრული ვალდებულებების მომდევნო პერიოდში გადატანის გამო).

რესპუბლიკური ბიუჯეტის გადასახდელების საპროგნოზო მოცულობა იზრდება 29526,3 ათასი ლარით:

აჭარის ავტონომიური რესპუბლიკის უმაღლესი საბჭოს ასიგნება - 324,0 ათასი ლარით;

აჭარის ავტონომიური რესპუბლიკის ფინანსთა და ეკონ­ომიკის სამინისტროს ასიგნება - 8 722,6 ათასი ლარით (მათ შორის სოციალური და სტიქიის შედეგად დაზარალებული ოჯახებისათვის საცხოვრებელი პირობების უზრუნველყოფა - 3 750,0 ათასი ლარით ქალაქ ბათუმში მეჯინისწყლის დასახლებაში ე.წ. „ოცნების ქალაქის“ ტერიტორიაზე მრავალბინიანი საცხოვრებელის სახლების მშენებლობის დაწყების მიზნით, შავი ზღვის სანაპირო ზოლში არსებული საკურორტო-სარეკრეაციო ადგილების ურბანული განვითარება - 1 300,0 ათასი ლარით გონიოს საკურორტო ადგილის სანაპირო ზოლის ნაწილის ქალაქმშენებლობითი და დეტალური დაგეგმარების შემუშავების მიზნით, ბათუმის ბულვარის ინფრასტრუქტურის მოვლა-შენახვისა და განვითარების ხელშეწყობა - 534,3 ათასი ლარით, გზების რეაბილიტაცია - 1 360,4 ათასი ლარით, საგზაო ინფრასტრუქტურის მოვლა-შენახვა - 1 010,0 ათასი ლარით, ტურისტული პროდუქტების განვითარება და დივერსიფიკაცია - 200,0 ათასი ლარით);

აჭარის ავტონომიური რესპუბლიკის განათლების, კულტურისა და სპორტის სამინისტროს ასიგნება - 3 970,5 ათასი ლარით (მათ შორის სსიპ ახალგაზრდობის რეგიონული ცენტრის და ახალგაზრდული პროგრამებისათვის 1 774,1 ათასი ლარით, განათლების მართვა, კულტურისა და სპორტის სფეროს პოლიტიკის შემუშავება და მართვა - 484,8 ათასი ლარით, განათლებისა და კულტურის დაწესებულებების ინფრასტრუქტურისა და მატერიალურ-ტექნიკური ბაზის გაუმჯობესებისათვის 534,9 ათასი ლარით,  სპორტული ღონისძიებები - 297,7 ათასი ლარით);

აჭარის ავტონომიური რესპუბლიკის ჯანმრთელობისა და სოციალური დაცვის სამინისტროს ასიგნება - 2 903,7 ათასი ლარით (მათ შორის ჯანმრთელობის დაცვის პროგრამები - 2 464,7 ათასი ლარით,  რომლის ფარგლებში ემატება ახალი ქვეპროგრამა 99,0 ათასი ლარით ბავშვებში ტყვიის ტოქსიური ზემოქმედების მართვის ხელშეწყობა, სოციალური პროგრამები - 391,3 ათასი ლარით);

სოფლის მეურნეობის სამინისტროს ასიგნება - 4 634,7 ათასი ლარით (მათ შორის „სოფლის მეურნეობის განვითარება მაღალეფექტური ტექნოლოგიების დანერგვის გზით“ პროგრამის ფარგლებში გათვალისწინებული ქვეპროგრამების ღონისიებების განხორციელება გაგრძელდება სოფლის მეურნეობის სამინისტროსა და ააიპ აგროსერვის ცენტრის მეშვეობით, ააიპ აგროპროექტების მართვის ცენტრის ლიკვიდაციის გამო, ამასთან „სოფლის მეურნეობის მექანიზაციის ტექნიკური საშუალებებით ფერმერთა და აგრომეწარმეთა უზრუნველყოფის ხელშეწყობის“ ქვეპროგრამის ფარგლებში იზრდება ბაღის შემასხურებელი აპარატების დამატებით შესყიდვა და „სოფლის მეურნეობის მცირე მექანიზაციის ტექნიკური საშუალებებით ფერმერთა და აგრომეწარმეთა უზრუნველყოფის ხელშეწყობის“ ქვეპროგრამის ფარგლებში ემატება ახალი კომპონენტი რძის გადამამუშავებელი სეპერატორების შესყიდვა, ასევე „სასათბურე მეურნეობების განვითარების ხელშეწყობის“ ქვეპროგრამის ფარგლებში იზრდება მოსაწყობი ინდივიდუალური სასათბურე მეურნეობის ფართობები);

საერთო რესპუბლიკური მნიშვნელობის ასიგნება - 8 970,8 ათასი ლარით (ადგილობრივ თვითმმართველ ერთეულებზე გადასაცემი კაპიტალური და სპეციალური ფინანსური დახმარება - 2 208,7 ათასი ლარით, გერმანიის რეკონსტრუქციის საკრედიტო ბანკიდან (KFW) მიღებული სესხის მომსახურების ხარჯები - 1 550,0 ათასი ლარით, ხულოს მუნიციპალიტეტში, კურორტ გოდერძზე, ფიზიკურ პირთათვის მიწის ნაკვეთების სანაცვლოდ კომპენსაციების გაცემა - 462,0 ათასი ლარით, სარეზერვო ფონდი - 900,0 ათასი ლარით და ავტონომიური რესპუბლიკის ტერიტორიაზე არსებულ მუნიციპალიტეტებში განსახორციელებელი პროექტების ფონდი - 3 850,0 ათასი ლარით).