მარტვილში მცხოვრები აფხაზეთიდან დევნილი 43 ოჯახი (114 სული) დღეიდან ახალ ბინებში იცხოვრებს. დევნილებს ახალმოსახლეობა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა მიულოცა.
ყოფილი მესამე სკოლის შენობაში დევნილები სხვადასხვა კომპაქტური ობიექტებიდან გადავიდნენ. როგორც დევნილები აცხადებენ, ადრე ძალიან ცუდ პირობებში იყვნენ. არც ცველი წერტილი ჰქონდათ და არც სამზარეული. ახალი, სრულად რეაბილიტირებული ობიექტი მათთვის სერიოზული საჩუქარია.
თეა ხარბედია, აფხაზეთიდან დევნილი: „ადრე ჩვენი საცხოვრებელი არანაირ ადამიანურ პირობებს არ ჰგავდა. წლების განმავლობაში ყურადღების გარეშე ვიყავით. როცა გავიგეთ, რომ ჩვენთვის ბინების გარემონტება იწყებოდა, არავის გვჯეროდა. რომ წამოვედით და აქაურობა ვნახეთ, ვერ დავიჯერეთ, რომ ეს ჩვენი იქნებოდა. ძალიან მოხარულები ვართ. აქ მაცხოვრებელი 43 ოჯახის სახელით შემიძლია ვთქვა, რომ ადამიანებად ვიქეცით. ძალიან ბედნიერები ვართ რომ ასეთი კომფორტული ბინა გვაჩუქეს. ახალი ჭერი პირველად მინისტრმა სუბელიანმა დაგვილოცა."
მინისტრმა დევნილებთან საუბრისას აღნიშნა, რომ საცხოვრებელი ფართების დაკანონების პროცესი მალე დაიწყება: „როგორც იცით, თბილისში დაკანონების პროცესი დასრულდა, რეგიონებში კი იწყება. აღნიშნულ ობიექტში 43
ოჯახი შესახლდა. ეს ფართი მათი საკუთრება იქნება. დღევანდელი გეგმით, აფხაზეთიდან დევნილი 11 000 ოჯახი საკუთარ ჭერს მიიღებს. აფხაზეთში დაბრუნების შემთხევევაში შეეძლებათ ეს ქონება გაყიდონ და ხელცარიელები არ დაბრუნდნენ."
რეგიონებში დევნილთა განსახლების პროცესი გრძელდება. მიმდინარე კვირას მინისტრი დასავლეთ საქართველოში მცხოვრებ სხვა დევნილებსაც ესტუმრება.
