რუსეთის მხრიდან აგრესიაზე საუბარი ვერბალურ დონეზეც კი საქართველოსთვის საფრთხეს წამოადგენს.
ამის შესახებ საქართველოს საგარეო საქმეთა მინისტრის მოადგილემ ნინო კალანდაძემ დღეს გამართულ ბრიფინგზე რუსეთის თავდაცვის მინისტრის ანატოლი სერდიუკოვის განცხადების კომენტირებისას განაცხადა.
"რუსეთი საქართველოს მიმართ აგრესიულ რიტორიკას კვლავ აგრძელებს. ამის გათვალისწინებით კი საუბარი რუსეთთან ურთიერთობაში რაიმე გარღვევაზე სამწუხაროდ ძნელი წარმოსადგენია. რუსეთის ხელისუფლების წარმომადგენლების განცხადებები ჩვენი ქვეყნის მიმართ აგრესიული ხასიათისაა, და ვერბალურ დონზეც კი საფრთხეს წამოადგენს", - განაცხადა კალანდაძემ.
ამასთან, კალანდაძემ იმედი გამოთქვა, რომ კრემლის წარმომდგენლების მიერ აგრესიული სახის განცხადებებს საერთაშორისო გამოხმაურება და ადეკვატური შეფასება მოყვება.
"რუსული მხარის აგრესიული გამონათქვამების და ქმედების შესახებ ჩვენ თანამეგობრობას ყოველთვის ვაწვდით ინფორმაციას და იმედი გვაქვს, რომ მათ ქმედებებს ადეკვატური შეფასებები მოჰყვება", - აღნიშნა საგარეო საქმეთა მინისტრის მოადგილემ.
შეგახსენებთ, რომ რუსეთის თავდაცვის მინისტრის ანატოლი სერდიუკოვის განცხადებით, იმ შემთხვევაში თუ საქართველოს 2008 წელის მსგავს აგრესიას განახორციელებს მას რუსეთი 5 დღეზე ნაკლებ დროში აღკვეთს.