რუსეთის წინააღმდეგ საქართველოს სარჩელის წინასწარი მოსმენის შესახებ ჰააგის საერთაშორისო სასამართლომ ოფიციალური ინფორმაცია გამოაქვეყნა.
ჰააგის სასამართლოს ინფორმაციით, სასამართლო იმ ინფორმაციაზე მსჯელობას დაიწყებს, რომელიც მხარეებმა წინასწარი მოსმენისას წარმოადგინეს. ოფიციალურ ინფორმაციაში ნათქვამია ასევე, რომ მოსმენების შესახებ სასამართლოს გადაწყვეტილება ღია სხდომაზე გამოცხადდება, რომლის თარიღიც მოგვიანებით დაზუსტდება.
შეგახსენებთ, რომ ჰააგაში გაერო-ს საერთაშორისო სასამართლომ რუსეთის წინააღმდეგ საქართველოს სარჩელის წინასწარი საჯრო მოსმენა 13 სექტემბერს დაიწყო და 17 სექტემბერს დაასრულა.
სასამართლოში რუსეთის წინააღმდეგ სარჩელი საქართველოს ხელისუფლებამ 2008 წლის 12 აგვისტოს შეიტანა. საქართველო რუსეთის ფედერაციას 1990-იანი წლებიდან დღემდე საქართველოს ტერიტორიაზე რასობრივი დისკრიმინაციის ყველა ფორმის აკრძალვის შესახებ საერთაშორისო კონვენციის დარღვევაში ადანაშაულებს.
