ლონდონში ბრიტანელმა სამართალდამცავებმა დააკავეს 5 ადამიანი, რომლებიც, სავარაუდოდ, რომის პაპზე, ბენედიქტ მეთექვსმეტეზე, თავდასხმას გეგმავდნენ. ამის შესახებ "ბი-ბი-სი" იუწყება.
რომის პაპზე შესაძლო თავდასხმის შესახებ ინფორმაცია კონტრტერორისტული სამსახურის დაზვერვამ მიიღო. დაკავებულები ლონდონის ცენტრალური პოლიციის განყოფილებაში გადაიყვანეს. მიმდინარეობს მათი დაკითხვა.
"ბი-ბი-სის" ინფორმაციით, დაკავებულები დიდი ბრიტანეთის მოქალაქეები არ არიან. მათი ასაკი 26-იდან 50 წლამდეა.
აღნიშნულ საქმესთან დაკავშირებით, პოლიცია სხვა პირების დაკავებასაც არ გამორიცხავს.
შეგახსენებთ, რომ რომის პაპი ბრიტანეთში 16 სექტემბერს ჩავიდა. იგი უკვე შეხვდა დედოფალ ელიზაბეტ მეორეს. პაპის ვიზიტი კიდევ 3 დღეს გაგრძელდება.
