ჩეჩნეთის მეთაურს რამზან კადიროვს იმედი აქვს, რომ პოლონეთის მთავრობა "სწორ გადაწყვეტილებას მიიღებს, რუსეთის ფედერაციასა და პოლონეთის ურთიერთობებს გაითვალისწინებს და ბოევიკ ახმედ ზაკაევის რუსეთში ექსტრადაციას გადაწყვიტავს". კადიროვი ასევე აცხადებს, რომ პოლონეთში დაკავებულ ჩეჩნეთის დევნილი მთავრობის მეთაურს ახმედ ზაკაევს სამუდამო პატიმრობა ელის.
"თუკი მსოფლიოში არსებობს კანონი და სამართლიანობა, მაშინ ზაკაევი აუცილებლად უნდა გადასცენ რუსეთის ფედერაციას, ანუ ჩვენ. ჩვენ იგი კანონით უნდა დავსაჯოთ", _ აცხადებს რამზან კადიროვი.
მისივე თქმით, "კანონის მიხედვით მას სამუდამო პატიმრობა უნდა მიესაჯოს. ეს ჩემი აზრია. მისი მოკვლა ან რამე მსგავსი - მისთვის ყველაზე სასიამოვნო იქნებოდა. იგი სამუდამოდ ციხეში უნდა ჩაჯდეს, რომ ნახოს თუ რას აკეთებდა იგი. ის კარგი მსახიობია და კარგადაც უჭირავს თავი მსახიობურად", _ აცხადებს რამზან კადიროვი.
მან ასევე მიმართა იქ ქვეყნების ხელმძღვანელობებს, რომლებმაც რუსეთის მოქალაქეებს თავშესაფარი მისცეს: "ჩვენ კიდევ გვყავს ასეთი მსახიობები, რომლებიც ახლაც საზღვარგარეთ ცხოვრობენ სხვა და სხვა ელიტურ ადგილებში და მათ კარგადაც იცავენ".
"რატომ აჩერებენ ისინი თავიანთი ქვეყნის ტერიტორიაზე იმ ადამიანებს, რომლებიც მშვიდობიან მოქალაქეებს ხოცავდნენ? მათ ამ ადამიანების გამო ყოველთვის პრობლები ექნებათ. ჩვენ ვთხოვთ ყველას, ვისაც ჩვენი ბანდიტები და ტერორისტები თავისთან ჰყავს დააკავონ ისინი და დაგვიბრუნონ ჩვენ. ჩვენ მათ კანონის მიხედვით დავსჯით", _ აცხადებს კადიროვი.
შეგახსენებთ, რომ პოლონეთის პროკურატურამ დევნილობაში მყოფი ჩეჩნეთის ლეგიტიმური მთავრობის თავმჯდომარე ახმედ ზაკაევი დღეს დააპატიმრა. ზაკაევის დაკავება მაშინ მოხდა, როდესაც იგი პროკურატურაში მიდიოდა. პოლონეთში ჩეჩენი ხალხის მსოფლიო კონგრესი მიმდინარეობს, რომელსაც ახმედ ზაკაევი უნდა დასწრებოდა.
ამავე დროს, რუსეთის გენპროკურატურა საბუთებს ამზადებს და პოლონეთის გენპროკურატურაში გადასაგზავნად ამზადებს. დოკუმენტაცია დღეს პოლონეთში დაკავებული ახმედ ზაკაევის რუსეთში ექსტრადაციას ეხება.
აღსანიშნავია, რომ პოლონეთის პრემიერ-მინისტრმა დონალდ ტუსკმა ზაკაევის დაკავებასთან დაკავშირებით განაცხადა, რომ "პოლონეთი ახმედ ზაკაევთან დაკავშირებულ გადაწყვეტილებას თავისი სახელმწიფოებრივი ინტერესების შესაბამისად მიიღებს და არ აპირებს ვინმეს მოლოდინის გამართლებას".
