საპარლამენტო უმცირესობა მცირე ბიზნესის დაბეგვრის წესს აპროტესტებს. ხელისუფლებამ 200 ათას ლარიანი ბრუნვიდან დაბეგვრის რეჟიმი 100 ათას ლარზე ჩამოწია. ამის შესახებ განცხადებები დღეს საგადასახადო კოდექსის მესამე მოსმენით განხილვისას საპარლამენტო უმცირესობის ლიდერმა გიორგი თარგამაძემ და საპარლამენტო უმცირესობის წარომადგენელმა გურამ ჩახვაძემ გააკეთეს.
როგოც გურამ ჩახვაძემ განაცხადა ახალი საგადასახადო კოდექსის ერთ-ერთ ნოვატორულ იდეად ჩაითვალა ის, რომ მცირე ბიზნესის არეალი გაფართოვდებოდა და 100 ათას ლარიანი ბრუნვიდან აიწევდა 200 ათას ლარზე, თუმცა მისი თქმით ეს პირობა მალევე შეიცვალა და ბრუნვის ზღვარი დაუბრუნდა ძველ ნიშნუს.
"ეს კი იმას ნიშნავს, რომ არანაირი ნოვატორული იდეა ამ კანონპროექტში აღარ არის. ამიტომაც ვამბობ, რომ ეს ეკონომიკური სტიმულირების საგადასახადო კოდექსი არ არის", - განაცხადა ჩახვაძემ.
თარგამაძემ კი დასძინა, რომ "ეს კოდექსი არის ადიმისტრირების კოდექსი და არა ეკონომიკური განვითარების".
ოპოზიციის ამ პროტესტის საპასუხოდ კი განცხადება პარლამენტის საფინანსო საბიუჯეტო კომიტეტის თავმჯდომარემ ზურაბ მელიქიშვილმა გააკეთა და განმარტა რომ, ქვეყანას ძალიან ბევრი სოციალური ვალდებულება აქვს აღებული და მისთვის გაუგებარია ოპოზციის იმ ნაწილის პროტესტი აღნიშნულ საკითხთან დაკავშირებით ვინც მუდმივად სოციალური პრობლემების მოგვარებას ითხოვს.
მისი თქმით, აღნიშნული საკითხი შეჯერდა ბიზნესმენებთან და მათი თანხმობით იქნა მცირე ბიზნესის ზღვარი ძველ ნიშნულზე შენარჩუნებული, ვინაიდან როგორც მელიქიშვილი განმარტავს წინააღმდეგ შემთხვევაში ქვეყანას საკმაოდ ბევრი შემოსავლი დააკლდებოდა, რაც მისი თქმით, ეკონომიკურ განვითარებას კი არა მის უკუსვლას შეუწყობდა ხელს.