საქართველოს კონკურენციის სააგენტოს თავმჯდომარემ ნოდარ ხადურმა სემინარი „კონკურენციის პოლიტიკა და დაზღვევის სფერო“ გახსნა, რომლიც ევროკავშირის პროექტის „საქართველოს კონკურენციის სააგენტოს მხარდაჭერა“ ფარგლებში გაიმართა.
„სემინარი კონკურენციის სააგენტოში მიმდინარე ევროკავშირის პროექტის ფარგლებში ხორციელდება. მადლობა მინდა გადავუხადო მოწვეულ ექსპერტებს, გუნდს მხარდაჭერისათვის და იმ გამოცდილების გაზიარებისათვის, რომელიც ერთობ მნიშვნელოვანია დღეს ჩვენთვის. ასევე მადლობა მონაწილეობისათვის სადაზღვევო კომპანიების წარმომადგენლებს, საქართველოს დაზღვევის სახელმწიფო ზედამხედველობის სამსახურს, რომელთანაც საქართველოს კონკურენციის სააგენტოს ურთიერთთანამშრომლობის მემორანდუმი აქვს გაფორმებული. დარწმუნებული ვარ, დღევანდელი შეხვედრა კიდევ ერთი წინ გადადგმული ნაბიჯი იქნება დაზღვევის სფეროში კონკურენციის ეფექტიანად აღსრულების მიმართულებით“, - განაცხადა შეხვედრაზე ნოდარ ხადურმა.
მონაწილეებს ასევე სიტყვით მიმართა ევროკავშირის პროექტის გუნდის ხელმძღვანელმა, სემინარის მოდერატორმა აურელიო ლა ტორემ და საქართველოს დაზღვევის სახელმწიფო ზედამხედველობის სამსახურის უფროსმა დავით ონოფრიშვილმა.
სემინარს უძღვებოდნენ მოწვეული ექსპერტები: რადუ ადრიან პაუნი, რუმინეთის კონკურენციის საბჭოს მრეწველობისა და ენერგეტიკის დეპარტამენტის უფროსის მოადგილე; დანიელ კოლგანი, კონკურენციისა და ევროკავშირის სამართლის სპეციალისტი; იგორ ტაკანი, ევროკავშირის მართლმსაჯულების სასამართლოს რეფერენტი. სემინარს ესწრებოდნენ: საქართველოს კონკურენციის სააგენტოს თანამშრომლები, დაზღვევის ზედამხედველობის სამსახურის, სადაზღვევო კომპანიებისა და ასოციაციების წარმომადგენლები.
მონაწილეებმა იმსჯელეს დაზღვევის სფეროში კონკურენციის აღსრულებასთან დაკავშირებულ სპეციფიკურ საკითხებზე. მათ შორის, კონკურენციის პოლიტიკა, დაზღვევის სფერო საქართველოში და მისი აღსრულება, ძირითადი მახასიათებლები; თანადაზღვევა და სადაზღვევო პულები; სადაზღვევო და საბანკო პროდუქტების მიბმა, ასევე რუმინეთის კონკურენციის უწყების გამოცდილება საავტომობილო შემთხვევის დროს მესამე პირის პასუხისმგებლობის დაზღვევის ბაზარზე და სხვა.
