რუსეთის ფედერაცია მსოფლიოში ტანკების გაყიდვის რეიტინგში პირველ ადგილზე გავიდა. ეს განცხადება მსოფლიოში იარაღით ვაჭრობის ცენტრის დირექტორმა იგორ კოროტჩენკომ გააკეთა.

ცენტრის მონაცემებით, რუსეთმა 2006-2009 წლებში უცხოელ დამკვეთებს 1,75 მილიარდი აშშ დოლარის ღირებულების 482 ახალი ტანკი მიყიდა.

"ამ დროისათვის რუსული ჯავშანტექნიკის ყველაზე მსხვილი შემსყიდველი ინდოეთია", _ აცხადებს კოროტჩენკო.

მსოფლიოში იარაღით ვაჭრობის ცენტრის პროგნოზით, 2010-2013 წწ რუსული ტანკების გაყიდვის მოცულობამ, უკვე გაფორმებული კონტრაქტებისა და შემოსული წინადადებების გათვალისწინებით შესაძლოა 895 ახალი ტანკი შეადგინოს, რომლის ღირებულებაც 2, 75 მილიარდი აშშ დოლარი იქნება.

"უპირველეს ყოვლისა ეს დაკავშირებულია იმასთან, რომ ბოლო დროს განვითარებულმა კონფლიქტებმა, მათ შორის კოალიციური ძალების სამხედრო ოპერაციამ ერაყში ახალი ტანკების გამოყენების მნიშვნელობა გაზარდა", _ აცხადებს კოროტჩენკო.

მსოფლიოში იარაღით ვაჭრობის ცენტრის მონაცემებით, ამ სფეროში დღეისათვის, რუსეთის ძირითადი კონკურენტები მსოფლიო ბაზარზე არიან აშშ და გერმანია.