ზვიად გამსახურდიას დაცვის უფროსი რობიზონ მარგველანი კატეგორიულად აცხადებს, რომ ზვიად გამსახურდიამ თავი მოიკლა. ეს განცხადება მარგველანმა დღეს პარლამენტში ზვიად გამსახურდიას გარდაცვალების ფაქტის შემსწავლელი კომისიის სხდომაზე კიდევ ერთხელ გაიმეორა.
მარგველანმა ჟურნალისტებთან საუბრისას კიდევ ერთხელ განაცხადა, რომ გამსახურდიამ თავი მოიკლა და იგი ამ ჩვენების შეცვლას არ აპირებს. მარგველანი აქცენტს აკეთებს იმაზე, რომ მისთვის გაუგებარია საზოგადეობის ოპოზიცია, როდესაც არ სჯერათ მისი, რომელიც უშუალოდ შეესწრო თვითმკვლელობის ფაქტს და უჯერებენ იმ ადამიანებს, ვინც იმ დროს იქ არ იმყოფებოდა და მხოლოდ ვარაუდებს გამოთქვამენ, რომ გამსახურდია შესაძლოა მოკული იყოს.
მარგველანის განმარტებით, სოფელ ხიბულაში გამსახურდიას გარდაცვალების ღამეს იარაღის გასროლის გაგონებისას იგი მაშინვე შევარდა გამსახურდიას ოთახში და პრეზიდენტი იხილა ისეთ მდგომარეობაში, როგორშიც ადამიანი თვითმკვლელობის შემდეგ შეიძლება აღმოჩნდეს.
"გარდაცვლილი იარაღით ხელში საწოლის თავს იყო მიყრდნობილი. შუბლიდან სისხლი ჩამოსდიოდა. შავი ლაქა რომ დავინახე, ხელზე მოვკიდე ხელი და სიმძიმით მივხვდი, რომ იარაღი ხელში ეჭირა", - აცხადებს მარგველანი და ვარაუდობს, რომ "გამსახურდია თვითმკვლელობამდე შესაძლოა იმ ჯოჯოხეთურ გზას მიეყვანა, რომელიც მან დევნილობაში გაიარა".
მარგველანის თქმით, სიცოცხლის ბოლო 10 დღის განმავლობაში გამსახურდია შიმშილობდა და ამის არგუმენტად ასახელებს იმას, რომ თავს ცუდად გრძნობდა.
"ამბობდა, თითქოს მუცელში ლოდი მაქვსო", - აცხადებს მარგველანი. იგი აღნიშნავს, რომ გამსახურდია ამ დღეებში არც თავის მოწამვლის ფაქტს გამორიცხავდა.
"პრეზიდენტი იმასაც ამბობდა, რომ არსებობს პრეპარატები, რომლებიც ადამიანის ორგანიზმზე მიღებიდან 3-4 თვის შემდეგ მოქმედებს და შეიძლება მომწამლესო", - აცხადებს მარგველანი. როგორც იგი აღნიშნავს, მას ექიმიც მიუყვანეს, თუმცა ექიმს გასინჯვის საშუალება არ მისცა და გააგდო.
უშუალოდ თვითმკვლელობის დროს კი, მარგველანის თქმით, პრეზიდენტის გვერდით ეძინა ყოფილ პრემიერ-მინისტრს, ბესარიონ გუგუშვილს, რომელსაც იარაღი არასოდეს ჰქონია. მარგველანის განმატებით, როდესაც მათ გაიგონეს სროლის ხმა, ორივე ფეხზე წამოხტა და ერთმანეთს გამსახურდიას ოთახში შესასვლელ კარში შეეჩეხნენ.
მარგველანის ვარაუდს ზვიად გამსახურდიას მიერ თავის მოკვლის ფაქტთან დაკავშირებით არ იზიარებს გამსახურდიას გარდაცვალების ფაქტის შემსწავლელი კომისიის თავმჯდომარე კონსტანტინე გამსახურდია. მისი თქმით, მარგველანის პოზიციას ეწინააღმდეგება მთელი რიგი ფაქტები, რისი დაკონკრეტებისგანაც გამსახურდია ჯერჯერობით თავს იკავებს და აცხადებს, რომ ეს ყველაფერი კომისიის საბოლოო დასკვნაში აისახება.