თურქეთმა კატეგორიულად დაგმო საფრანგეთისა და იტალიის ქმედებები, რომლებიც მე-20 საუკუნის დასაწყისში ოსმალეთს იმპერიის მიერ სომხების მასობრივი მკვლელობების გენოციდად აღიარებისკენ არის მიმართული.
გუშინ, 10 აპრილს, იტალიის პარლამენტის ქვედა პალატამ ქვეყნის მთავრობას მოუწოდა გენოციდად ოფიციალურად აღიაროს 1915-16 წლებში ოსმალეთის იმპერიაში სომხების მასობრივი მკველობები.
შეგახსენებთ, რომ ამ წლის თებერვალში საფრანგეთის პრეზიდენტმა ემანუელ მაკრონმა 24 აპრილი სომხების გენოციდის ხსოვნის ეროვნულ დღედ გამოაცხადა.
მაკრონის ეს გადაწყვეტილება მკაცრად დაგმო თურქეთის პრეზიდენტის ერდოღანის წარმომადგენელმა და აღნიშნა რომ სომეხთა გენოციდის შესახებ მტკიცება წარმოადგენს პოლიტიკურ სიცრუეს.
2016 წელს გერმანიამ ოსმალეთის იმპერიაში სომხების მასობრივი განადგურება გენოციდად გამოაცხადა, რამაც თურქეთის ხელისუფლების მწვავე რეაქცია გამოიწვია.
თურქეთი არ ეგუება ტერმინ „გენოციდის“ გამოყენებას 1915 წლის მოვლენების მიმართ და აცხადებს, რომ მაშინ ოსმალეთის იმპერიაში მიმდინარეობდა ძმათამკვლელი ომი და ყველა მხარე დიდ დანაკარგებს განიცდიდა.
