საპარლამენტო ოპოზიციის წარმომადგენელი დიმიტრი ლორთქიფანიძე აცხადებს, რომ ვენეციის კომისია საკონსტიტუციო ცვლილებების პროექტთან დაკავშირებით თავის რეკომენდაციებში უსათუოდ ასახავს სასამართლოს საბოლოო აქტების გასაჩივრების საკითხს. ამის შესახებ განცხადება ლორთქიფანიძემ დღეს პარლამენტში ვენეციის კომისიასთან გამართული შეხვედრის შემდეგ გააკეთა.
საკონსტიტუციო ცვლილებების პროექტთან დაკავშირებით ვენეციის კომისიამ შეხვედრა დღეს პარლამენტში საპარლამენტო უმცირესობასთან გამართა. როგორც ლორთქიფანიძე აღნიშნავს, ამ შეხვედრაზე პირადად მან კიდევ ერთხელ დააყენა საკითხი, რომელიც შეეხება სასამართლოს საბოლოო აქტების გასაჩივრების შესაძლებლობას. ლორთქიფანიძის პროტესტს ის ფაქტი იწვევს, რომ ეს საკითხი საბოლოო პროექტში ასახული არ არის. იგი აქცენტს იმაზე აკეთებს, რომ ამ საკითხთან დაკავშირებით ვენეციის კომისის წევრები მის პოზიციას იზიარებენ და მიაჩნიათ, რომ ასეთი აქტების საკონსტიტუციო სასამართლოში გასაჩირების გადაწყვეტილება დადებითი მიდგომა იქნებოდა. ლორთქიფანიძის მტკიცებით, ვენეციის კომისია ამ საკითხს საბოლოო რეკომენდაციებში უსათუოდ ასახავს.
რაც შეეხება ლორთქიფანიძის ამ მოთხოვნას, მისი თქმით, "ამ პრინციპის გატარება იქნებოდა "ქართული სტრასბურგის" მსგავსი სასამართლო, ვიანიდან დღეს სასამართლო გავსებულია უკანონო და დაუსაბუთებელი განაჩენების მქონე მსჯავრდებულების საქმეებით".
ლორთქიფანიძეს მიაჩნია, რომ მოქალაქეს უნდა ჰქონდეს უფლება, თავისი კონსტიტუციური უფლების დასაცავად სასამართლოს გადაწყვეტილება გაასაჩივროს საკონსტიტუციო სასამართლოში. საპარლამენტო უმრავლესობას კი მიაჩნია, რომ ამ ინიციატვის განხორციელება საკონსტიტუციო სასამართლოს გადატვირთავს და საბოლოოდ მის დისკრედიტაციას შეუწყობს ხელს. სწორდ ამ არგუმენტით იქნა უარი ნათქვამი აღნიშნული ინიციატვის საკონსტიტუციო ცვლილებების პროექტში გათავლისწინებასთან დაკავშირებით.
