აშშ-სა და რუსეთის თავდაცვის მინისტრებმა რობერტ გეიტსმა და ანატოლი სერდიუკოვმა, ვაშინგტონში გამართული მოლაპარაკებების შედეგად აშშ-სა და რუსეთის თავდაცვის სამინისტროებს შორის თანამშრომლობის მემორანდუმს მოაწერეს ხელი.
აშშ-სა და რუსეთის თავდაცვის მინისტრებმა ასევე მიიღეს ერთობლივი განცხადება თავდაცვითი ურთიერთობების შესახებ.
დოკუმენტთა შინაარსის კომენტირებისას აშშ-ს თავდაცვის მინისტრმა რობერტ გეიტსმა განაცხადა, რომ ეს ორივე დოკუმენტი ძალიან მნიშვნელოვანია.
"ეს ორივე ხელმოწერილი შეთანხმება ძალიან მნიშვნელოვანია, რომელთა საფუძველზეც უნდა აშენდეს ჩვენი ორმხრივი ურთიერთობები", _ განაცხადა გეიტსმა.
მისივე თქმით, ეს ორი ხელმოწერილი შეთანხმება საფუძველი იქნება იმისა, რომ აშშ-სა და რუსეთს ექნება ბევრი საერთო ღონისძიება, სწავლება და პროგრამა, რომლებიც მთელი რიგი მიმართულებებით განხორციელდება.
რუსული მედია ასევე იუწყება, რომ რობერტ გეიტსი ასევე აცხადებს, რომ შეთანხმების მემორანდუმი შეცვლის 1993 წელს ორი ქვეყნის თავდაცვის უწყებებს შორის ხელმოწერილ დოკუმენტს თანამშრომლობის შესახებ.
მისივე თქმით, შეთანხმების მიხედვით ორივე მხარეს იქმნება სამუშაო ჯგუფები.
"ეს დოკუმენტი ითვალისწინებს ფორუმის შექმნას, რომელის ფარგლებშიც შესრულდება პრეზიდენტების ბარაკ ობამასა და დიმიტრი მედვედევის მიერ თავდაცვის სამინისტროებისათვის მიცემული განკარგულებები. სამუშაო ჯგუფების თანათავმჯდომარეები აშშ-სა და რუსეთის თავდაცვის მინისტრები უხელმძღვანელებენ. ჯგუფები წელიწადში ერთხელ მაინც გამართავენ შეხვედრას", _ აცხადებს გეიტსი.
