"საქართველო გაეროს საერთაშორისო სასამართლოში რუსეთის ფედერაციის გენოციდში დადანაშაულებით, თავისი დანაშაულის დაფარვას ცდილობს", _ ეს განცხადება რუსეთის დუმის საერთაშორისო საქმეთა კომიტეტის თავმჯდომარის მოადგილემ ლეონიდ სლუცკიმ გააკეთა.
"რუსეთის ფედერაცია არ ახდენს ქართველების დისკრიმინაციას და ეს არც არასოდეს მოუხდენია. ეს არის მცდელობა, გადატანილ იქნეს ყურადღება რეალურად არსებული ტრაგიკული სიტუაციიდან, რომელიც მშვიდობიანი ქალაქის წინააღმდეგ განხორციელებულმა აგრესიამ განაპირობა, რასაც შედეგად ადამიანთა დაღუპვა მოჰყვა", _ აცხადებს სლუცკი და დასძენს, რომ საქართველოს ქმედებების გამო ე. წ. სამხრეთ ოსეთის 70-ათასიანი მოსახლეობიდან დევნილადაა ქცეული 34 ათასი ადამიანი.
სლუცკი ასევე აცხადებს, რომ გაეროს სასამართლოში შეტანილი სარჩელით საქართველოს პრეზიდენტი მიხეილ სააკაშვილი "საერთაშორისო არენაზე თავისი პოლიტიკური სპექტაკლის გახანგრძლივებას ცდილობს".
შეგახსენებთ, რომ 13 სექტემბერს ქალაქ ჰააგაში, გაეროს საერთაშორისო სასამართლოში 2008 წლის აგვისტოს მოვლენებთან დაკავშირებით რუსეთის წინააღმდეგ საქართველოს სარჩელის საჯარო განხილვა დაიწყო. განხილვა 17 სექტემრამდე გაგრძელდება.
რუსეთი თავის პოზიციებს 13 და15 სექტემბერს, ხოლო საქართველო 14 და 17 სექტემბერს წარმოაჩენს. საქმესთან დაკავშირებული არგუმენტები წერილობითი სახით ორივე მხარემ უკვე წარადგინა სასამართლოში.
ჰააგის სასამართლოზე ქართულ მხარის უფლებებს საქართველოს იუსტიციის მინისტრის პირველი მოადგილე თინათინ ბურჯალიანი დაიცავს. საგარეო საქმეთა სამინისტროდან პროცესს ნინო კალანდაძე დაესწრება. ასევე საქართველოს ინტერესებს უცხოელი ადვოკატები _ ჯეიმს კროუფორდი, ფილიპ სანდსი, პოლ რაიხლერი და პაია ახავანი _ დაიცავენ.
საქართველომ გაეროს საერთაშორისო სასამართლოს 2008 წლის 12 აგვისტოს მიმართა და რუსეთი ყველა ფორმის რასობრივი დისკრიმინაციის საერთაშორისო კონვენციების დარღვევაში დაადანაშაულა.
