"დემოკრატიული მოძრაობა - ერთიანი საქართველოს" მთავარი საბჭო საქართველოს შინაგან საქმეთა მინისტრს ვანო მერაბიშვილს ღია წერილს უგზავნის და ავსტრიის პოლიციის იმ მასალების გამოქვეყნებას სთხოვს, სადაც ნინო ბურჯანაძის ოჯახის ახლობლების ბრალეულობა იკვეთება.
"ბოლო ორი წლის განმავლობაში საქართველოს პრეზიდენტის, მიხეილ სააკაშვილის არაერთ განცხადებაში გაისმა უსაფუძვლო ბრალდებები "დემოკრატიული მოძრაობა-ერთიანი საქართველოს" ლიდერის ნინო ბურჯანაძის, მისი თანაპარტილებისა და ოჯახის წევრების მისამართით. ამჯერად მიხეილ სააკაშვილს საფუძვლად მოჰყავს ავსტრიის პოლიციის გამოძიების 42 გვერდიანი მასალა, რომელიც მისი ინფორმაციით თქვენს უწყებას გადაეცა და ამავე დროს გამოქვეყნდა ავსტრიულ გაზეთში", - ნათქვამია ბურჯანაძის პარტიის წერილში.
წერილის მიხედვით, "დემოკრატიული მოძრაობა" შს მინისტრს სთხოვს გამოქვეყნდეს ავსტრიული მხარის მიერ შსს-სთვის მიწოდებული მასალა, რომლის საფუძველზეც მათი ინფორმაციით, პირდაპირ ეთერში, საქართველოს პრეზიდენტმა განცხადება გააკეთა.
"ვინაიდან, არცერთ ოფიციალურ დოკუმენტში და ავსტრიის ოფიციალურ პირებთან ჩვენს საუბარში არ დასტურდება ჩვენთან დაკავშირებით მსგავსი ბრალდება, მოვითხოვთ გამოქვეყნდეს თქვენს უწყებაში არსებული ავსტრიული მხარის მიერ მოწოდებული მასალა, რომლის საფუძველზეც გააკეთა განცხადება პირდაპირ ეთერში საქართველოს პრეზიდენტმა ან უარყოთ ეს განცხადება. წინააღმდეგ შემთხვევაში კიდევ ერთხელ ნათლად დადასტურდება საყოველთაოდ ცნობილი ფაქტი, რომ საქართველოს ხელისუფლების უმაღლესი პირი - ქვეყნის პრეზიდენტი პოლიტიკური ოპონენტების დისკრედიტაციისა და მათთან ბრძოლის მიზნით წინასწარი განზრახვით ავრცელებს ცრუ ინფორმაციას", - აღნიშნულია "დემოკრატიული მოძრაობა - ერთიანი საქართველოს" წერილში.
