აჭარაში „სოფლის მხარდაჭერის პროგრამა“ ხორციელდება.
პროექტების შერჩევის მიზნით, მოსახლეობასთან შეხვედრები აქტიურად მიმდინარეობს.
აჭარის ფინანსთა და ეკონომიკის მინისტრმა ჯაბა ფუტკარაძემ, ქედის მერის პირველ მოადგილესთან როლანდ ბერიძესთან ერთად, ქედის მუნიციპალიტეტში, გულებისა დ აქუცას მოსახლეობასთან შეხვედრები გამართა.
ჯაბა ფუტკარაძე ადგილობრივების საჭიროებებსა და ინიციატივებს ადგილზე გაეცნო. მინისტრმა სოფლის მხარდაჭერის პროგრამის მნიშვნელობაზე და პრიორიტეტებზე ისაუბრა. ჯაბა ფუტაკარაძემ მოსახლეობას ქედაში და ზოგადად მაღალმთიან აჭარაში ტურიზმის განვითარების მიმართულებით დაგეგმილი პროექტები გააცნო.
სეტყვით დაზარალებულთა კომპენსაცია, აქუცის მრავალფუნქციური სახლის რემონტი, აქუცის სკოლის ეზოს კეთილმოწყობა და არსებული სპორტული მოედნის რეაბილიტაცია, საგზაო ინფრასტრუქტურის მოწესრიგება გულებში - მოსახლეობის მიერ დასმული საკითხები სოფლის მხარდაჭერის პროგრამის ფარგლებში განხორციელდება.
დღესვე შეხვედრები იაკობაურის, კობალთის, ქუთაურის, ტომაშეთის, დარჩიძეების და წელათის მოსახლეობასთან გაიმართა.
,,სოფლის მხარდაჭერის პროგრამის" ბიუჯეტი ქედაში 740 000 ლარია.
მუნიციპალიტეტის 63 სოფლის მოსახლეობა თავად აირჩევს სოფლისთვის გათვალისწინებული ბიუჯეტით, განსახორციელებელ პრიორიტეტებს.
,,სოფლის მხარდაჭერის პროგრამა" მუნიციპალიტეტებში განსახორციელებელი პროექტების ფონდიდან განხორციელდება. ქობულეთის, ხელვაჩაურის, ქედის, შუახევის, ხულოს მუნიციპალიტეტის 328 სოფელი 4304000 ლარით დაფინანსდება. 2019 წლის რესპუბლიკური ბიუჯეტით კი აჭარის ა.რ მუნიციპალიტეტებისთვის დამატებით 60 მილიონი ლარია განსაზღვრული.
