საბანკო სფეროს ექსპერტმა გიორგი ცუცქირიძემ სოციალურ ქსელში Facebook - ი სარეიტინგო კომპანიის Fitch - ის მიერ საქართველოსთვის სუვერენული საკრედიტო რეიტინგის გაუმჯობესებას გამოეხმაურა. კერძოდ, მსოფლიოს ერთ-ერთმა წამყვანმა სარეიტინგო კომპანია Fitch-მა, საქართველოს სუვერენული საკრედიტო რეიტინგი წინა წლის „BB-“ -დან „BB“-მდე ანუ ერთი საფეხურით გააუმჯობესა. რეიტინგის გაუმჯობესება ძირითადად 2018 წლის განმავლობაში სტაბილური მაკროეკონომიკური და ფინანსური გარემოს შენარჩუნებით არის განპირობებული.
გიორგი ცუცქირიძის განცხადებით, „სუვერენული საკრედიტო რეიტინგი, ეს არის ყველაზე მნიშვნელოვანი ინდიკატორი, რომელსაც დიდ ყურადღებას აქცევენ საერთაშორისო ინვესტორები და რაც ყველაზე მნიშვნელოვან გავლენას ახდენს უკვე ქვეყნის წამყვანი ბანკებისა და კომპანიების მიერ უცხოური დაფინანსების საპროცენტო განაკვეთზე, რადაგან ეკონომიკური განვითარების ტენდენციებს და რისკებს ასახავს“.
ექსპერტის განცხადებით, „დღის განმავლობაში ამ საკითხზე ბევრი განცხადება გაკეთდა, ბევრმაც საკუთარ გვერდზე სოციალურ ქსელში დააფიქსირა საკუთარი აზრი და რაც ყველაზე მეტად მომხვდა თვალში არის ის, რომ Fitch-ის სრულიად ობიექტური შეფასება ზოგიერთმა ვიწრო პოლიტიკურ კონტექსტში გადაიტანა. სამწუხაროა, ისინი რაციონალურს ვერაფერს ამბობენ და მათი კრიტიკა, ფაქტობრივად, წმინდა სუბიექტივიზმით არის გაჟღენთილი.“
„სამწუხაროდ, ის პრობლემები რომელიც ჩვენი ეკონომიკის თანმდევია, გასული წლების ეკონომიკური პოლიტიკა განაპირობებდა. სწორედ, 2003-2012 წლებში წარმოებული ეკონომიკური პოლიტიკის შედეგი იყო მაღალი დოლარიზაციაც და სავაჭრო ბალანსის სარეკორდო დეფიციტი, რომელიც 2012 წლისათვის 5 მლრდ დოლარს ასცდა და მხოლოდ ბოლო წლებში დაიწყო შემცირება. მიმდინარე ანაგარიშის დეფიციტი 13 % დან 7.2 %-მდე, ხოლო სავაჭრო დეფიციტი 54 % დან 42 %-მდე, რაც მომსახურების და საქონლის ექსპორტის ზრდის შედეგია და 7.8 %-მდე უნდა იყოს,“ - განაცხადა გიორგი ცუცქირიძემ.
„მიმაჩნია, რომ სუვენერული რეიტინგის გაუმჯობესება შემთხვევით არ მომხდარა. საერთაშორისო სარეიტინგო კომპანიების გადაწყვეტილებებზე მნიშვნელოვან ზეგავლენას საერთაშორისო სავალუტო ფონდის შეფასებები ახდენს. ამ თვალსაზრისით, საინტერესოა, რომ სსფ-ის მისიამ საქართველოს ეკონომიკის 2018 წლის ზრდის პროგნოზი 4.8 % დან წლიურ 5.5 პროცენტამდეც კი აწია, მოსალოდნელზე მაღალი ეკონომიკური აქტივობის გამო, მიუხედავად იმისა, რომ ეკონომიკაზე შესაძლო უარყოფითი გავლენის მქონე რისკები გაიზარდა სხვა ქვეყნებში მიმდინარე მოვლენების გამო. შემთხვევითი არც ის გარემოება იყო, რომ საერთაშორისო სავალუტო ფონდის "გაფართოებული დაფინანსების მექანიზმით" მხარდაჭერილი მიმდინარე პროგრამის ანგარიშშიც ცალსახად არის აღნიშნული, რომ „მიმდინარე ეკონომიკური გაჯანსაღება შესაძლებელს ხდის განხორციელდეს ისეთი რეფორმები, რომლებიც ხელს შეუწყობს საგარეო შოკებისადმი მდგრადობას და უფრო მაღალ და ინკლუზიურ ეკონომიკურ ზრდას. ძალზე მნიშვნელოვანია, რომ ამ ბოლო მოხსენების თანახმად, „ხელისუფლების მიერ დაწყებული რეფორმების განუხრელი განხორციელება ხელს შეუწყობს მაღალ ზრდას გრძელვადიან პერიოდში და გააუმჯობესებს ეკონომიკის მდგრადობას,“ - განაცხადა საბანკო სფეროს ექსპერტმა გიორგი ცუცქირიძემ.
