შინაგან საქმეთა სამინისტრომ 2 პირი დააკავა, რომლებმაც ველოსიპედში „268 აბი სუბუტექსი“ მოათავსეს და იტალიიდან ფოსტით გამოაგზავნეს
შინაგან საქმეთა სამინისტრომ, მიმდინარე წელს, პოლიციის მიერ ნარკოდანაშაულის სხვადასხვა ფაქტის შესახებ აცნობა საზოგადოებას. ცენტრალური კრიმინალური პოლიციის დეპარტამენტის დირექტორის მოადგილე მამუკა ჭელიძემ, რამდენიმე გახსნილი საქმის შესახებ ისაუბრა, მათ შორის, დიდი ოდენობით ნარკოტიკული საშუალების საქართველოში უკანონოდ შემოტანის ან ნარკოტიკების ფოსტის საშუალებით გადაზიდვის შემთხვევებზე.
მამუკა ჭელიძის განცხადებით, პოლიციამ საქართველოს ფოსტასთან თანამშრომლობით, თბილისში დააკავა დანაშაულებრივი დაჯგუფების წევრები - წარსულში ნარკოდანაშაულისთვის ნასამართლევი 2 პირი - დ.კ. და ზ.შ. , რომლებმაც განსაკუთრებით დიდი ოდენობით ნარკოტიკული საშუალება იტალიიდან საქართველოში, საფოსტო გზავნილის სახით გამოგზავნეს. დანაშაული 15-დან 20 წლამდე ან უვადო თავისუფლების აღკვეთას ითვალისწინებს.