ზაზა სარალიძისა და მთავარი პროკურორის, შალვა თადუმაძის შეხვედრა დასრულდა. შეხვედრას ხორავას ქუჩის საქმის პროკურორებიც ესწრებოდნენ.
სარალიძის თქმით, კითხვებზე, რომელიც გენერალურ პროკურორს დაუსვა, პასუხები ვერ მიიღო.
"ძალიან ბევრი კითხვები იქნა დასმული, რომლებზეც ფაქტია, პასუხი ვერ მივიღე. იქიდან გამომდინარე, რომ ვადასტურებ ისევ და ისევ იმას, რომ არასწორი ინფორმაცია მიაქვთ ბატონ გენ პროკურორამდე. იქ ესწრებოდნენ საქმის პროკურორები, რომლებსაც გარკვეული კითხვები დავუსვი, მაგრამ სამწუხაროდ, იმაზეც ვერ მივიღე პასუხები. არაფერი არ არის ფაქტიურად შეცვლილი წინა შეხვედრის შემდეგ. იქიდან გამომდინარე, რომ ფაქტია საქმის პროკურორები მაქსიმალურად ცდილობენ, მიხეილ კალანდიას გამოყვანას ამ საქმიდან",- ამბობს სარალიძე.
"არა მხოლოდ კონკრეტულ საქმეში მონაწილე პირები არამედ ისინი, ვინც უხეშად ჩაერია ამ საქმეში, მივიღე პირობა, რომ დაწყებულია სამსახურებრივი მოკვლევა, ვნახოთ, რა პასუხს მივიღებთ უმოკლეს ხანში",- აღნიშნა მან