დღეს, 13 სექტემბერს, ბაქოში აზერბაიჯანის, საქართველოს და რუმინეთის ენერგეტიკის მინისტრების შეხვედრა გაიმართება. მინისტრები სამი ქვეყნის პირველი პირების შეხვედრამდე, რომელიც 14 სექტემბერს გაიმართება, ევროპაში გაზის ტრანსპორტირების ტექნიკურ საკითხებზე იმსჯელებენ, ევროპაში გაზის ტრანსპორტირების საკითხის განხილვა "გათხევადებული ბუნებრივი გაზის და მისი ტრანსპორტირების სფეროში თანამშრომლობის შესახებ~ მემორანდუმის ფარგლებში გაიმართება, რომელსაც საქართველომ, აზერბაიჯანმა და რუმინეთმა2010 წლის 13 აპრილს ბუქარესტში მოაწერეს ხელი.
მემორანდუმი ითვალისწინებს საქართველოში გაზის გამათხევადებელი, ხოლო რუმინეთში რეგაზიფიკაციის ტერმინალების მშენებლობას.
პროექტის მიხედვით, გაზის გამათხევადებელი ტერმინალი საქართველოში, სავარაუდოდ, ყულევში აშენდება. პროექტის ღირებულება, წინასწარი გათვლებით, 4-6 მლრდ ევროს შეადგენს.
პროექტის თანახმად, საქართველოდან გათხევადებული გაზის რუმინეთში ტრანსპორტირება მოხდება. რუმინეთში გათხევადებული გაზი მიიღებს ისევ ბუნებრივი გაზის სახეს და შემდგომ ის განკუთვნილი იქნება ევროპული ქვეყნების მოთხოვნების დასაკმაყოფილებლად.