კონკურენციის სააგენტო ხორბლისა და პურპროდუქტების ბაზარზე არსებულ ვითარებას სწავლობს. როგორც „ჯი-ეიჩ-ენს“ უწყებაში განუცხადეს, კონკურენციის სააგენტოს თავმჯდომარის, ნოდარ ხადურის გადაწყვეტილებით, ,,კონკურენციის შესახებ“ საქართველოს კანონის შესაბამისად, სააგენტომ კომპეტენციის ფარგლებში, დაიწყო ხორბლისა და პურპროდუქტების ბაზარზე დღეს არსებული ვითარების შესწავლა, მონიტორინგი. მათივე ინფორმაციით, დადგენილი წესის შესაბამისად, ამ ეტაპზე, მიმდინარეობს საკითხის შესწავლა - შესაბამისი ინფორმაციის გამოთხოვა, დამუშავება.
„ინფორმაციის გამოთხოვა მიმდინარეობს პურის საცხობებიდან და წისქვილკომბინატებიდან. გარკვეული ინფორმაცია მიღებულია, გარკვეული სახის ინფორმაციების მიღების პროცესი ჯერ კიდევ მიმდინარეა. მასალები საკმაოდ ბევრია, ფრაგმენტულად მასზე საუბარი არ იქნება სწორი. გამოთხოვილი ინფორმაცია მოიცავს კომპანიების წარმადობას, რა ფასად ყიდულობენ ფქვილს ან ხორბალს, რა ფასად ყიდიან მზა პურს და ფქვილს და ა.შ. ასევე უწყება სწავლობს ენერგო და წყლის კომპანიებისაგან გამოთხოვილ ინფორმაციებს, ფასების დინამიკას და ა.შ.“, - განუცხადეს „ჯი-ეიჩ-ენს“კონკურენციის სააგენტოში.
შეგახსენებთ, რომ 2018 წლის დეკემბერში საქართველოს პრემიერ-მინისტრმა ქვეყანაში პურის ფასის ზრდასთან დაკავშირებით, შესაბამის ორგანოებს ვითარების უმოკლეს ვადებში შესწავლისკენ მოუწოდა. მაშინ მთავრობის მეთაურმა განაცხადა, რომ არსებობს მოსაზრება, რომ შესაძლოა, საქმე გვქონდეს არასამართლიან კონკურენციასთან, რაც დაუშვებელია. „მინდა, შევეხო დღევანდელ ინფორმაციას, რომ მოხდება პურის ფასის მკვეთრი ზრდა. არსებობს მოსაზრება, რომ ჩვენ, შეიძლება, საქმე გვქონდეს არასამართლიან კონკურენციასთან. მინდა, შესაბამის ორგანოებს მივმართო, უმოკლეს ვადებში შეისწავლონ ეს სიტუაცია და მოამზადონ ანგარიში, რასთან გვაქვს საქმე. საქართველო არის საბაზრო ეკონომიკა, ჩვენ ვართ ღია ეკონომიკა, მაგრამ არასამართლიანი კონკურენციის საშუალებას ვერავის მივცემთ”, - განაცხადა მამუკა ბახტაძემ.
