ეკონომიკისა და მდგრადი განვითარების სამინისტრო მიმდინარე პრივატიზაციას დადებითად აფასებს. სამინისტროს ინფორმაციით, 9 და 10 სექტემბერს სამინისტროში გამართული აუქციონის შედეგად ბიუჯეტში 9 მლნ. 150 ათასი დოლარი შევიდა.
9 სექტემბერს ეკონომიკისა და მდგრადი განვითარების სამინისტრომ აუქციონის წესით 6 მილიონ 850 ათას დოლარად რკინაბეტონის შპალების ქარხანა გაყიდა. საწარმოს მფლობელი კომპანია "მიქსორი" გახდა, რომელიც საწარმოში მნიშვნელოვანი ინვესტიციის განხორციელებას გეგმავს.
შედეგად, ქარხანა შეძლებს, გააფართოვოს ასორტიმენტი, გამოუშვას არამხოლოდ რკინიგზის შპალები, არამედ სხვადასხვა სახის სამშენებლო კონსტრუქციები. ამ ეტაპზე საწარმოს აქვს მოქმედი კონტრაქტები საქართველოს რკინიგზასთან. იგი განლაგებულია 4 ჰექტარ მიწის ფართობზე, საწარმოში ამ ეტაპზე დასაქმებულია 120 ადამიანი.
რაც შეეხება კიდევ ერთ მნიშვნელოვან ობიექტს - ყოფილი გეოლოგიის ინსტიტუტის შენობას, ის 10 სექტემბერს 2,3 მლნ. დოლარად კომპანია "ალიანსმედიმ" შეიძინა.
ობიექტის საწყისი საწყისი ფასი 1,5 მლნ დოლარი იყო. ობიექტი შედგება 9 შენობა-ნაგებობისაგან - საერთო ფართი 11 192 კვადრატული მეტრი.
