სანამ ჩემი შვილის უდანაშაულობა არ დადგინდება და სანამ ჩემი შვილის მკვლელები არ დაისჯებიან, სიკვდილზეც წავალ, ვფიცავ დღევანდელ დღეს, ჩემი შვილის სულს ვფიცავ, ყველანაირ იმას გამოვნახავ, რომ ეს ადამიანები დაისაჯონ, - ამის შესახებ სპეცოპერაციისას მოკლული თემირლან მაჩალიკაშვილის დედამ მედიკო მარგოშვილმა რუსთაველის გამზირზე განაცხადა, სადაც სპეცოპერაციიდან ერთი წლის თავზე მდუმარე აქცია გაიმართა.
მდუმარე აქციაზე ერთი წლის წინ პანკისის ხეობაში ჩატარებული სპეცოპერაციისას მოკლული თემირლან მაჩალიკაშვილის ოჯახის წევრები და მხარდამჭერები შეიკრიბნენ.
აქციის მონაწილეებმა კიდევ ერთხელ მოითხოვეს პასუხი, ვინ და რატომ ესროლა თემირლან მაჩალიკაშვილს და რატომ არ ისჯებიან დამნაშავეები.
თემირლანის მამა, მალხაზ მაჩალიკაშვილი სპეცრაზმელისა და უსაფრთხოების სამსახურის უფროსის დასჯას ითხოვს.
„გავიდა ერთი წელი ოპერაციის ჩატარების დღიდან კი არა, თემირლანის დახვრეტის დღიდან. იმ დღეს თემირლანის ცხედარი იქნა გატაცებული ჩემი ოჯახიდან, რომ მისი თავიდან კვალი წაეშალათ. ერთი წელია, ველოდები ამ არაშემდგარი ხელისუფლებისგან, ბოროტით სავსე შექუჩებული ხროვისგან, თუნდაც პატარა რამით მიანც ეღიარებინათ ის შეცდომა, რაც სახელმწიფომ, ამ ხელისუფლებამ დაუშვა, მაგრამ ამაოდ“, - განაცხადა მალხაზ მაჩალიკაშვილმა.
