უკვე თუ არ არის აღძრული საქმე, უახლოეს დღეებში საქმე აღიძვრება და გამოძიება დაიწყება, - ამის შესახებ შინაგან საქმეთა მინისტრმა გიორგი გახარიამ გავრცელებული ვიდეო-კადრებთან დაკავშირებით განაცხადა, რომელიც არჩევნების დროს კომისიის წევრების მიერ ბიულეტენების ყუთში ჩაგდებას ეხებოდა.
კითხვაზე, დაიწყო თუ არა გამოძიება, მინისტრმა უპასუხა, რომ ამ საკითხზე ცესკო-მ მიმართა პროკურატურას და ის დარწმუნებულია, რომ ის გამოძიებას უახლოეს მომავალში დაიწყებს.
„ტელევიზიაში გაშვებული კადრები, როდესაც საარჩევნო პროცესის უხეში დარღვევა იყო ნაჩვენები და იქ უბრალოდ, ჩაყრის კადრები იყო. მეც და თქვენც კარგად ვიცით, რომ ცესკო-მ უკვე მიმართა პროკურატურას ამ თემასთან დაკავშირებით, ისევე როგორც რამდენიმე არასამთავრობო ორგანიზაციამ მიმართა პროკურატურას და დარწმუნებული ვარ უკვე თუ არ არის აღძრული საქმე, უახლოეს დღეებში საქმე აღიძვრება და გამოძიება დაიწყება", - განაცხადა გახარიამ პარლამენტში.