"რთველი 2010" ოფიცილაურად დაიწყო. სოფლის მეურნეობის მინისტრმა ბაკურ კვეზერელმა და კახეთის გუბერნატორმა გიორგი ღვინიაშვილმა გურჯაანში რთველის საკოორდინაციო შტაბი გახსნეს.
სოფლის მეურნეობის მინისტრის ინფორმაციით, კახეთში რთველი აქტიურ ფაზაში რამდენიმე დღეში შევა. მინისტრის თქმით, ამ დროისთვის ყურძენს სიღნაღის, გურჯაანის, თელავის და ყვარლის რაიონებში 8 ღვინის ქარხანა იბარებს.
შტაბს სოფლის მეურნეობის სამინისტროს ადმინისტრაციული დეპარტამენტის უფროსი ტარიელ გაბუნია უხელმძღვანელებს.
წელს კახეთში 85 584 ტონა ყურძნის მოსავალია მოსალოდნელი. აქედან 58 419 ტონა რქაწითელია, 22 831 ტონა საფერავი და 4 335 ტონა ჰიბრიდული ჯიშის ყურძენი. ყურძნის ყველაზე მეტი მოსავალი - 21 180 ტონა გურჯაანშია მოსალოდნელი. 2 958 ტონა ყურძენს ელიან დედოფლისწყაროს რაიონში, 5 155 ტონას ახმეტის რაიონში, 16 400 ტონას ყვარლის რაიონში, 5 907 ტონას ლაგოდეხის რაიონში, 9 088 ტონას სიღნაღის რაიონში, 10 507 ტონას თელავის რაიონში, 14 389 ტონას საგარეჯოს რაიონში.
ღვინის ქარხნები ერთი კილოგრამი საფერავის ჯიშის ყურძენს 40 თეთრად იბარებენ და სუბსიდიის სახით დამატებით 25 თეთრი გაიცემა. რქაწითელში 30 თეთრს ღვინის ქარხანა იხდის, 15 თეთრი სუბსიდიიდან გაიცემა.
რთველი კახეთში სექტემბრის ბოლომდე დამთავრდება.