ფინანსთა მინისტრის მოადგილე გიორგი კაკაურიძე განმარტავს, რომ 2018 წელს ეკონომიკური ზრდა, დაგეგმილზე უფრო მაღალი იქნება. მინისტრის მოადგილის თქმით, 2018 წლის ბიუჯეტში გათვალისწინებული იყო 4,5%-იანი ეკონომიკური ზრდა, ათი თვის მონაცემებით კი ზრდა - 5%-ია.

„ეკონომიკურმა ზრდამ დაახლოებით 250 მილიონი ლარით მეტი შემოსავალი მოგვცა. ეს ნაწილდება მუნიციპალიტეტებზე, ასევე 200 მილიონი ლარია ბიუჯეტში“, – განაცხადა გიორგი კაკაურიძემ.

შეგახსენებთ, რომ 2018 წლის სახელმწიფო ბიუჯეტში შესატანი ცვლილებების მიხედვით, ეკონომიკური ზრდა 4.5-დან 5%-მდე იზრდება. ამ ფონზე, 240 მილიონი ლარი ემატება ნაერთი ბიუჯეტის საგადასახადო შემოსავლების გეგმას.  ხდება ცალკეული უწყებების ხარჯების კორექტირება. მათ შორის, ინფრასტრუქტურის სამინისტროს ბიუჯეტი, დამტკიცებულ გეგმასთან შედარებით, 269 მილიონი ლარით მცირდება, რაც სხვადასხვა ინფრასტრუქტურული პროექტის განხორციელების გადავადებას უკავშირდება.