9 სექტემბერს, 14:00 საათზე, ევროკავშირი-საქართველოს ბიზნეს საბჭო (EUGBC) და საქართველოს სოფლის მეურნეობის სამინისტრო, EUGBC-ს საპატიო წევრის, არვე ტორვიკის ხელშეწყობით მართავენ სემინარს - "რა უნდა იცოდნენ ალკოჰოლური სასმელების ქართველმა მწარმოებლებმა ნორვეგიის ბაზარზე შესაღწევად". სემინარი ჩატარდება, სოფლის მეურნეობის სამინისტროს სურსათის უვნებლობის, ვეტერინარიისა და მცენარეთა დაცვის ეროვნული სამსახურის საკონფერენციო დარბაზში (მარშალ გელოვანის გამზ. 6.).
როგორც "ჯი-ეიჩ-ენს" ღონისძიების ორგანიზატორებმა აცნობეს, სემინარი მიზნად ისახავს ალკოჰოლური სასმელების ქართველ მწარმოებლებს მიაწოდოს ინფორმაცია ნორვეგიის ალკოჰოლური სასმელების ბაზრის თავისებურებების შესახებ და შესაბამისად აამაღლოს მათი ცოდნა შემდეგ თემებთან დაკავშირებით: ნორვეგიის ალკოჰოლური სასმელების ბაზრის ისტორიული მიმოხილვა; ნორვეგიის ბაზარზე ალკოჰოლური სასმელების იმპორტის სპეციფიკა; სახელმწიფო მონოპოლიის როლი; ნორვეგიის ალკოჰოლური სასმელების ბაზრის სტატისტიკური მონაცემები და ტენდენციები; ალკოჰოლური სასმელების დაბეგვრის სისტემა ნორვეგიაში.
სემინარზე დასწრება უფასოა და მონაწილეობის მიღება შეუძლია ნებისმიერ დაინტერესებულ კომპანიასა თუ მეწარმეს.