საქართველოში უკრაინის მოქალაქეების ჩამოსვლასა და იმ საპროტესტო გამოსვლებს შორის კავშირზე, რომლითაც რევოლუციური სცენარი იყო დაგეგმილი, კითხვები ჩნდება, - ამის შესახებ პარლამენტის იურიდიულ საკითხთა კომიტეტის თავმჯდომარე ეკა ბესელიამ უკაინის 6 მოქალაქის დაკავებასთან დაკავშირებით განაცხადა.
მისი თქმით, დასადგენია, ამ მოვლენასა და დაგეგმილ აქციებს, პროვოკაციებს შორის კავშირი ხომ არ არის, რადგან მისივე თქმით, საეჭვო გარემოებები არსებობს, რაც გამოიხატება ამ ადამიანების ჩამოსვლასა და შესაძლო კავშირში სამხედრო დაჯგუფებებთან, რომლებიც უკრაინაში იბრძოდნენ.
„ასევე, ხომ არ არის რამე ბმა განცხადებებთან, რომელსაც მიხეილ სააკაშვილი აკეთებდა? ერთ-ერთი დეპუტატის სააკაშვილთან შეხვედრაც დადასტურდა. კითხვები ჩნდება კავშირების თაობაზე, ასევე მათ ჩამოსვლასა და იმ საპროტესტო გამოსვლებს შორის, რომლითაც დაანონსებული იყო რევოლუციური სცენარი. უფრო მეტ ინფორმაციას ველოდებით, რომ დასკვნების გაკეთება შეგვეძლოს“, – განაცხადა ბესელიამ.
ცნობისთვის, თბილისში სპეცოპერაციის შედეგად უკრაინის ექვსი და საქართველოს ერთი მოქალაქე დააკავეს. შსს-ს ცნობით, დაკავებულები არიან უკრაინის მოქალაქეები: ო.ნ., რ.მ., დ.კ. ი.კ., ი.ო., ს.კ. და საქართველოს მოქალაქე ლ.ჩ. მათი ცნობით, სასტუმროს ნომრების ჩხრეკისას ამოღებულია ბერეტას და მაკაროვის სისტემის ცეცხლსასროლი პისტოლეტი, ავტომატური ხელნაკეთი ცეცხლსასროლი იარაღი და სხვადასხვა სახის საბრძოლო მასალა.
მათივე ინფორმაციით, ამ ეტაპზე გამოძიება დაწყებულია საქართველოს სსკ-ის 236-ე მუხლის მე-3 და მე-6 ნაწილებით, რაც ჯგუფურად ცეცხლსასროლი იარაღის, საბრძოლო მასალის, ფეთქებადი მოწყობილობის მართლსაწინააღმდეგო შეძენა-შენახვას გულისხმობს.
