პროკურატურაში ე.წ. ყალბი პირადობის მოწმებების საქმეზე ლანჩხუთის საკრებულოს „ნაციონალური მოძრაობის“ წევრ კახა ასკურავას კითხავენ.
როგორც ასკურავამ პროკურატურაში შესვლამდე ჟურნალისტებს განუცხადა, თან აქვს 17 პირადობის მოწმობა, რომელიც საარჩევნო უბანთან 200 მეტრში იპოვა და რომელიც მისი თქმით, ხელისუფლებამ არჩევნების გასაყალბებლად გამოიყენა.
“გადავცემ ამ მტკიცებულებებს, რომელიც ერთ-ერთ საარჩევნო უბანთან სარდაფში დაყრილი აღმოვაჩინე. 17 პირადობის მოწმობა, რომელიც არის უვადოდ გაცემული, არც ერთ შემთხვევაში არ უნდა ეყაროს სარდაფში, საარჩევნო უბნიდან 200 მეტროში. აბსოლუტურად ყველა არის გარდაცვლილი და მთავარ პროკურატურას მივმართავ, დაადგინოს ამ პირადობების წარმოშობა. ასეთი გატკიცინებულია“, – განაცხადა კახა ასკურავამ, რომელმაც აქვე აღნიშნა, რომ პირადობების ნაწილი 2004, 2006 და 2008 წელს არის გაცემული, თუმცა ასკურავა ამბობს, რომ აპარატები ახლაც ინახება იუსტიციის სახლებში.
ასკურავას ვერსიით, არჩევნების გაყალბების რამოდენიმე სისტემა ჰქონდა „ქართულ ოცნებას“ და ერთი იყო ყალბი პირადობის მოწმობების გამოყენება. მისივე თქმით, თუ პროკურატურა მიიღებს გადაწყვეტილებას, გახსნას საარჩევნო მასალები და იქ აუცილებლად აღმოჩნდება ყალბი სიები, რომლითაც მისცემდნენ ხმას.
მისივე განცხადებით, მას უკვირს არასამთავრობო ორგანიზაციების, რომლებიც ყალბ პირადობის მოწმობებზე საუბრობდნენ, ამ დრომდე კი არც ერთი მათგანი არ გამოხმაურებია.
