თბილისის საქალაქო სასამართლოში ზაზა სარალიძისა და მალხაზ მაჩალიკაშვილის სარჩელის განხილვა მიმდინარეობს.
მათი სარჩელი საპატრულო პოლიციის დეპარტამენტის წინააღმდეგ არის მომზადებული.
მოსარჩელეები იმ გადაწყვეტილების ბათილად ცნობას მოითხოვენ, რომლითაც მათივე თქმით, მათ შეეზღუდათ მშვიდობიანი შეკრების უფლება და არ მიეცათ პარლამენტის შენობის მიმდებარე ტერიტორიაზე კარვის განთავსების შესაძლებლობა.
როგორც პროცესის დაწყებამდე ზაზა სარალიძემ განაცხადა, შსს-მ უნდა წარადგინოს ის მტკიცებულება, რის საფუძველზე უკრძალავდნენ მათ კარვების დადგმას, მაგრამ კარვები უკვე განთავსებულია და მისი თქმით, გაუგებარია, რა აზრი აქვს სხდომას.
„კარვები უკვე გაშლილია და რაღა აზრი აქვს სხდომას... ძალოვანი უწყება განმარტავდა, რომ [კარვების დადგმით] საშიშროებას ჰქონდა ადგილი, რა საშიშროებაზეა საუბარი?“,- განაცხადა სარალიძემ.
ზაზა სარალიძის და მალხაზ მაჩალიკაშვილის ინტერესებს სასამართლოში EMC-სა და საია-ს იურისტები იცავენ.
