შინაგან საქმეთა სამინისტრომ მედიაში გავრცელებული ინფორმაციის საფუძველზე, ეროვნულ-დემოკრატიული პარტიის თავმჯდომარე ბაჩუკი ქარდავაზე შესაძლო თავდასხმის ფაქტზე შესაბამისი რეაგირება მოახდინა და ბაჩუკი პოლიციის განყოფილებაში გამოსაკითხად დაიბარა, – ამის შესახებ საქართველოს შინაგან საქმეთა სამინისტროში განაცხადეს.
სამინისტროს ცნობით, ვაკე-საბურთალოს სამმართველოში უკვე გამოიკითხა ბაჩუკი ქარდავა, რომელმაც დღეს, ყიფშიძის ქუჩაზე მომხდარ ინციდენტთან დაკავშირებით განმარტა, რომ მის მიმართ ვინმეს მხრიდან ძალადობას ან სიტყვიერ შეურაცხყოფას ადგილი არ ჰქონია.
„ვინაიდან აღნიშნული არ შეიცავს საქართველოს სისხლის სამართლის კოდექსით გათვალისწინებული დანაშაულის ნიშნებს, მომხდარზე გამოძიება არ დაწყებულა“, – აცხადებენ შსს-ში.
დღეს გაერთიანებული ოპოზიციის საპრეზიდენტო კანდიდატმა გრიგოლ ვაშაძემ საგანგებო ბრიფინგზე განაცხადა, რომ ეროვნულ-დემოკრატიული პარტიის თავმჯდომარე ბაჩუკი ქარდავას თავს დაესხნენ.
