თამაზ ახობაძე, რომელიც დანაშაულის პრევენციის ცენტრიდან ანა სუბელიანთან ერთად 2013 წელს გაათავისუფლეს, იუსტიციის სამინისტროსთან შიმშილობას აპირებს.
როგორც ახობაძე განმარტავს, დანაშაულის პრევენციის ცენტრმა საქართველოს მთავრობას საპასუხო წერილი გაუგზავნა და ეს წერილი, მისივე თქმით, მის დისკრედიტაციას ემსახურება.
"არავინ ამ ხელისუფლებაში, საერთოდ არავინ, არ ფიქრობს არანაირ სამართლიანობაზე. ძალიან დავიღალე და გადავწყვიტე მივმართო უკიდურეს ზომას.
როგორც იქნა დანაშაულის პრევენციის ცენტრმა უპასუხა საქართველოს მთავრობას. პასუხი არის ამაზრზენი და დამცინავი. რამდენიმე ფაქტი:
1. ჩემს შეკითხვაზე "როგორ უნდა მოიქცეს მოქალაქე, როდესაც სახელმწიფო არ აღასრულებს სასამართლო გადაწყვეტილებას?" ცენტრი პასუხს იწყებს ასე: "ამ კითხვაზე პასუხის გაცემა და სამართლებრივი პროცედურების განმარტება არ უნდა წარმოადგენდეს კორესპონდენციის ავტორის ნამდვილ მიზანს...
2. თამაზ ახობაძე ცდილობს ისე წარმოაჩინოს ვითარება, როდესაც არსებობს აღსასრულებელი გადაწყვეტილება და სახელმწიფოს მხრიდან ადგილი აქვს უბრალო უმიზეზო უმოქმედობას. ამგვარად ვითარების წარმოჩენა სრულიად მოკლებულია საფუძველს და უბრალოდ არ შეეფერება სინამდვილეს;
3. გადაწყვეტილებით განსაზღვრულია თამაზ ახობაძის აღდგენა არა მის მიერ დაკავებულ თანამდებობაზე, არამედ ტოლფას თანამდებობაზე. თამაზ ახობაძე ამ თანამდებობისთვის განსაზღვრულ საკვალიფიკაციო პირობებს ვერ აკმაყოფილებდა;
წერილი სრულად ემსახურება ჩემს დისკრედიტაციას.
თუ მანამდე ვერ დავინახე მთავრობის მხრიდან კონკრეტული ქმედებები, ორშაბათიდან იუსტიციის სამინისტროს წინ ვიწყებ შიმშილობას. იქნებ ასე მაინც მომაქციოს ვინმემ ყურადღება", - აღნიშნავს ახობაძე.
ცნობისთვის, იუსტიციის სამინისტრომ დანაშაულის პრევენციის ცენტრიდან თამაზ ახობაძე და ანა სუბელიანი 2013 წელს გაათავისუფლა. ორივეს შემთხვევაში სააპელაციო სასამართლომ სამინისტროს მათი თანამდებობაზე აღდგენა და განაცდურის ანაზღაურება დაავალა. აღნიშნული დავა თამაზ ახობაძემ იუსტიციის სამინისტროს უზენაეს სასამართლოშიც მოუგო.
