„აიფიემ კვლევების“ მიერ ჩატარებული გამოკითხვის შედეგად ირკვევა, რომ მსოფლიოში ერთ-ერთი ყველაზე პოპულარული სასმელი - ყავა, საქართველოშიც საკმაოდ საყვარელი სასმელია. კვლევამ გამოავლინა, რომ გამოკითხულთა 81%-ი ყავას კვირაში ერთხელ მაინც სვამს
„აიფიემ კვლევების" მონაცემებითვე, ყავას უფრო ხშირად ქალები სვამენ - საშუალოდ, კვირაში 8-ჯერ; თუმცა, მათ საგრძნობლად არც კაცები ჩამოუვარდებიან - ისინი კვირაში 6-ჯერ მიირთმევენ ყავას. კაცები ყავას ყველაზე მეტად ახალგაზრდა ასაკში (18-24 წ.) მიირთმევენ, ასაკთან ერთად კი მას უფრო ნაკლებად მოიხმარენ. ქალები ყველაზე აქტიურად ყავას 35-44 წლის ასაკში სვამენ.
გავრცელებული მოსაზრება, რომ ყავის სმის პროცესს ადამიანები დიდ დროს უთმობენ, კვლევის შედეგებმა არ დაადასტურა.
როგორც აღმოჩნდა, ადამიანი ერთ ჯერზე, საშუალოდ, 11 წუთს ანდომებს ყავის დალევას. წლის განმავლობაში კი ყავის სმაზე დახარჯული დრო 3 დღეს აღწევს.
თუ მიღებულ მონაცემებს 2006 წელს ჩატარებული მსგავსი კვლევის შედეგებს შევადარებთ, აღმოჩნდება, რომ ყავის სმაში დახარჯული დრო უმნიშვნელოდ არის გაზრდილი ყველა ასაკობრივ ჯგუფში.
საბოლოო ჯამში, ისეთი ხანმოკლე აქტივობაც კი, როგორიც ყავის სმაა, მთელი სიცოცხლის განმავლობაში ადამიანის ცხოვრების საკმაოდ მნიშვნელოვან დროს იკავებს. კერძოდ, 65 წლის ადამიანს, დაახლოებით 155 დღე ყავის სმაში აქვს გატარებული.
ავტორი: . .
