„საქართველოს ახალგაზრდა იურისტთა ასოციაცია“ პრეზიდენტის არჩევნების მეორე ტურის კენჭისყრის დღის დაკვირვების, 10:00 საათისთვის არსებულ შედეგებს აქვეყნებს. როგორც „ჯი-ეიჩ-ენს“ საია-დან აცნობეს, ამ ეტაპზე საიას დამკვირვებლების მიერ დაიწერა სულ 6 საჩივარი: 3 საჩივარი - უბანზე, 3 საჩივარი ოლქში, ასევე ჩანაწერთა წიგნში დაფიქსირდა 3 შენიშვნა.

საია-ს ინფორმაციით, ამ დროისათვის ფიქსირდება მნიშვნელოვანი ტენდენციები, რომელიც ხმის მიცემის ფარულობას და ამომრჩევლის ნების კონტროლს უკავშირდება

კერძოდ, ამ დროისათვის საიას დამკვირვებლების მიერ ხმის მიცემის ფარულობის დარღვევის 7 ფაქტი დაფიქსირდა (კახეთში -5, ახალქალაქში - 2), რა დროსაც კაბინიდან გამოსული ამომრჩეველი მის მიერ გაკეთებული არჩევანის იდენტიფიცირების შესაძლებლობას ცალკეული ორგანიზაციების დამკვირვებლებს ან/და კომისიის წევრებს აძლევდა. ასევე, დაფიქსირდა ამომრჩევლის ნების კონტროლი უბნების მიმდებარე ტერიტორიაზე.

საიამ პროცედურულ დარღვევებზეც მიუთითებს. კერძოდ, დამკვირვებლებისთვის ხელის შეშლა,  წილისყრის პროცედურების დარღვევა, უბნის დაგვიანებით გახსნა, გადასატანი საარჩევნო ყუთის სია.