ბორჯომ-ხარაგაულის ეროვნულ პარკში ევროპის დაცული ტერიტორიების ქსელის PAN-Pარკ-ების ინიციატივით, კონფერენცია "ევროპის ველური ბუნების მენეჯმენტის გაუმჯობესება" იმართება.
როგორც "ჯი-ეიჩ-ენს" გარემოს დაცვის სამინისტროდან აცნობეს, კონფერენცია გარემოს დაცვისა და ბუნებრივი რესურსების მინისტრმა გოგა ხაჩიძემ და PAN-Park-ების მმართველობითი საბჭოს თავმჯდომარემ ლუის ფრანკენჰუისმა ოფიციალურად გახსნეს.
"ძალინ მნიშვნელოვანია კონფერენციის საქართველოში ჩატარება, სადაც მოხდება ბორჯომ-ხარაგაულის ტურისტული პოტენციალის განხილვა. ჩვენ უნდა ვეცადოთ, რაც შეიძლება მეტი ტურისტი ჩამოვიყვანოთ ქვეყანაში. ეს არის დაცული ტერიტორიების და იმ ადამიანების შემოსავლები, რომლებიც დასაქმებულები არიან. ტურისტების რაოდენობის ზრდა ხელს უწყობს თითოეული დაცული ტერიტორიის გარშემო ბიზნესის განვითარებას. ნებისმიერი ტურისტი ჩვენი ქვეყნისთვის შემოსავალის წყაროა," განაცხადა გოგა ხაჩიძემ.
ევროპის დაცული ტერიტორიების ქსელის მე-9 კონფერენცია მიზნად ისახავს ეროვნულ პარკებს შორის ევროპული გამოცდილების გაზიარებას, სადაც ველური ბუნების დაცვის გაუმჯობესებას, ტურიზმის განვითარებას, ვიზიტორებთან კომუნიკაციის საშუალებებს, ბუნების დაცვაში რეინჯერთა როლს და ვიზიტორთათვის გაწეული ინტერპრეტაციის საკითხებს განიხილავენ. ასევე, კონფერენციაზე გაიმართება პრეზენტაცია - „რატომ და როგორ შეუერთდა ბორჯომ-ხარაგაულის ეროვნული პარკი PAN-Park-ებს" და ექსპერტების მიერ ხელახალი შეფასების შედეგად, ბორჯომ-ხარაგაულის ეროვნულ პარკს PAN პარკების სერთიფიკატი გადაეცემა, რომლის განახლება 5 წელიწადშაი ერთხელ ხდება.
კონფერენციაში მსოფლიოს სხვადასხვა ქვეყნების ექსპერტები და ევროპის 11 ეროვნული პარკის 70-მდე წარმომადგენელი იღებენ მონაწილეობას.
ევროპის დაცული ტერიტორიების ქსელის კონფერენცია წელიწადში ერთხელ იმართება. PAN-Pარკ-ების გადაწყვეტილებით, 2010 წელს კონფერენცია ბორჯომ-ხარაგაულის ეროვნულ პარკში დაიგეგმა, რომელიც 2007 წლიდან ევროპის დაცული ტერიტორიების ქსელის (PAN-Park) წევრია. PAN-Park ევროპის ველური ბუნების დაცვის ორგანიზაციას წარმოადგენს და ქმნის ევროპის დაცული ტერიტორიების ქსელს.