დღეს, 14 ნოემბერს, საკონსტიტუციო სასამართლო “ციანიდის საქმეში” გაუთქმელობის ვალდებულებაზე განხილვას იწყებს. სხდომა 11:00 საათზეა ჩანიშნული.
დეკანოზ გიორგი მამალაძის ადვოკატი გიორგი ფანცულაია „ჯი-ეჩი-ენთან“ საუბარში აცხადებს, რომ გაუთქმელობის ვალდებულებით, არაერთი მიმართულებით შეიზღუდა.
„ჩვენი შეზღუდვა მხოლოდ იმას არ მოიცავდა, რომ საჯაროდ ვერ ვახორციელებდით საზოგადოების თანდასწრებით დეკანოზის დაცვას. არამედ, გაუთქმელობის ვალდებულება არაერთი მიმართულებით გვზღუდავდა, ამის გამო, რიგი მტკიცებულებები ვერ მოვიპოვეთ. შესაბამისად, გადავწყვიტეთ, საკნოსტიტუციო სასამართლოში გაგვესაჩივრებინა ის ნორმები და ის კანონები სისხლის სამართლის კოდექსიდან და სისხლის სამართლის პროცესიდან, რომელიც ინტერპრეტაციის საშუალებას აძლევდა პროკურატურის მხარეს, რომ ჩვენ ცალმხრივად ჩავეყენებინეთ ამ მდგომარეობაში. დაგვიკავშირდნენ საკონსტიტუციო სასამართლოდან, რომ არსებითი განხილვები იწყება. ამ განხილვებზე გადაწყდება ის საკითხი, რომ ეს კონკრეტული ნორმები, რის გამოც, ე.წ. ციანიდის საქმეზე შევიზღუდეთ, დარჩეს თუ არა, ამ ფორმით. ეს მხოლოდ ციანიდის საქმეზე არ არის მნიშვნელოვანი, რადგან ჩვენ მუხლს ვასაჩივრებთ“, - დასძენს „ჯი-ეჩი-ენთან“ საუბარში ფანცულაია.
ადვოკატებს გასაჩივრებული აქვთ, სისხლის სამართლის საპროცესო კოდექსის 104-ე მუხლი და სისხლის სამართლის კოდექსის 374-ე მუხლი, რომელიც ცალმხრივად ადებს დაცვის მხარეს გაუთქმელობის ვალდებულებას.
